Дагъустан Республикайин Правительствойи адабгънайи къарарназ асас вуди, 1-пи майдихъан тина региондин аьтрафар цIийир кахьбан дюшюшарихьан уьрхру башкъа къайда кьабул дапIна.

 

 

Гьамдихъди аьлакьалу вуди, Республикайин яркврарин мяишатдин комитетдин кIулиъ айи Вагьаб Аьбдулгьямидовди муниципалитетариъ айи мешебеглугъариъ гюзчивал гъабхру дестйирин кьадар артухъ апIбан гьякьнаан мешебегйириз табшуругъ тувну.

«Гъи Дагъустандин яркврар цIихьан уьрхбан бадали, хъа асас вуди манишин гъабхьиган, инсанар яркур-кюл хъайи йишвариз рягьятвал гъадабгъуз гъюрайи вахтна, дицдар йишварихь гюзчивал гъабхурайи дестйири артухъди ляхин апIуз хъюгъру. Гьамусяаьт мицдар дестйири республикайин аьтрафариин 2 агъзур километрин рякъюн 215 маршрутдиъди гюзчивалин ляхин гъабхура. Амма фукьан ляхин гъубхишра, вижнасузди табиаьтдихьна янашмиш шулайи агьалйир себеб вуди, цIа кабхъувалин дюшюшар арайиз гъюра. ЦIа кабхъган гьарар, укIар, жакьвар, жюрбежюр гьйванатар ургура, диди гьадму йишварихь хьайи жиларин заан жарназра аьхю тясир апIура», – гъапну ярквран мяишатдин комитетдин кIулиъ айири.

Ав, яркврар цIа кабхъувалин дюшюшарихьан уьрхбан бадали, гьаммишан инсанарин арайиъ лазим вуйи мялуматар тарагъури а, амма гьаз-вуш сасдар касар му месэлайин важиблувалин гъавриъ шуладар. Гьаддиз Вагьаб Аьбдулгьямидовди, республикайин агьалйирихьинди илтIикIну, яркур-кюл багарихь хьайи йишварихьна рягьятвал гъадабгъуз гъушу касарикан цIа кчIибгуз чалишмиш дархьувал, яркврар багарихь хьайи гъулан мяишатдин фонднан жилариин укI-кьал ихтиятди убгувал ккун гъапIну. Хъа къанундиинди цIа кчIибгуз ихтияр айи йишварихь рягьятвал гъадабгъбан кьяляхъ, думу цIа ктIубшвуз кIваълан гьадрархувал ва уч гъабхьи зирзибил гьадушварихь дарабгъну гъидрибтувал гьарсар жавабдар касдин вазифа ву.