2019-пи йисхъан мина Дагъустан Республикайин экономикайинна аьтрафарин артмиш’валин министерствойи «Дагъустан Республикайин дагълу аьтрафарин яшайишдинна экономикайин артмиш’вал» кIуру субсидйир тувбан гьюкуматдин программа уьмриз кечирмиш апIура.
Программайин асас метлеб – дагълу аьтрафариъ экономика артмиш апIувал, хъа асас вуди, айи вари мумкинваларра ишлетмиш дапIну, гьюкуматдин терефнаан туврайии кюмекра гъадабгъну, дагълу аьтрафариъ алверчивал артмиш апIуз аьшкь капIувал ва дагълу гъулариан агьалйир шагьрариз кючмиш хьуз гъид-ритувал ву.
Программа гьяракатнаъ ипну, цци 4-пи йис ву. Гъийин йигъаз республикайин дагълу аьтрафариъ, яна гьюлихьан 500 метрин ягълишнаъди, 1000-тIан артухъ гъулар айи 30 муниципалитетар ерлешмиш духьна. Гъулан мяишат артмиш апIуз гьарсаб муниципалитетдиз мумкинвал а, ва душвариъ табиаьтдин шартIарра ужудар ву.
Дагъустандин экономикайинна аьтрафарин артмиш’валин министерствойин мялуматариинди, «Дагъустан Республикайин дагълу атрафарин яшайишдинна экономикайин артмиш’вал» программайиъ иштирак духьну субсидйир гъадагъуз мумкинвал туврайи конкурсдиз аьрзйир кьабул апIувал ккебгъна, ва думу ляхин 24-пи июндизкьан давам хьибди. Аьрзйир экономикайинна аьтрафарин артмиш’валин министерствойиъ ва республикайин МФЦ-йин идарайиъ кьабул апIура.
Къайд апIуб лазим вуки, программайиъ иштирак хьуз мумкинвал айидар, аьхиримжи 3 йисандин арайиъ рес-публикайин дагълу гъулариъ гьисабназ гъадагъну, гъулан мяишат артмиш апIурайи алверчйир ва кIул’инди вуйи мяишат айи физический касар ву.
«Программайин дахилнаъди гьюкуматдин терефнаан 6 жюрейин кюмек тувра. Дурарикан 4 – алверчивал апIурайи юридический касариз ва 2 – кIул’инди вуйи мяишатариз.
Гъулан мяишатдин цирк-лиан ипIру-убхъру сурсатарин промышленность артмиш апIуз, теплицйир ва мейв-йирна йимишар уьрхру йишвар яратмиш апIуз, лазим вуйи алатар ва авадлугъар масу гъадагъуз юридический касарин удучIву харжарин 50% кьяляхъ тувра. Дурариз кьяляхъ туврайи дакьатарин кьадар 50 агъзур манатдилан 3 миллион манатдиина ву.
Хъа кIул’инди вуйи мяишатарин гъулан мяишатдиъ лазим вуйи бицIи жюрейин техника масу гъадабгъуз удучIву харжариз туврайи субсидйирин кьадар исккан гьисаб 50 агъзур манатдилан 200 агъзуриина ву, ва гьацира 500 агъзур манат гизаф бегьер хру багълар кивуз грант жюрейиинди тувра», – мялум гъапну министерствойин экономикайин гьякьикьи сектор арт-миш апIбан управлениейин начальникдин заместитель Рабият Никацаевайи.
Аьхиримжи вахтна ихь районариъра гъулан мяишатдин цирклиъ ляхин апIурайи касарин кьадар артухъ шула. Лазим вуйи документар гьязур дапIну, къайд дапIнайи программайин субсидйир гъадагъуз мумкинвал туврайи конкурсдиъ иштирак хьуз гьяракат апIинай.
