Урусатдин Президент В. Путинди 9-пи майдиъ тасдикь гъапIу Указдиз асас вуди, РФ-ди Украинайиъ гъабхурайи хусуси метлеб айи операцияйин иштиракчйирин хизанариан вуйи баяр-шубар вузариз кьабул апIбан гьякьнаан цIийи къанун либхуз хъюбгъди.

 

Украинайиъ кIули гъябгъюрайи хусуси метлеб айи операцияйин иштиракчйир къанундиинди ветеранарси гьисаб дапIна. Дицдар абйир-бабарин баяр-шубариз Урусатдин вузариъ бюджетдин йишварин 10 % жара апIиди. Мидланра гъайри, женгариъ зиян гъабхьидарин вая (аьхю хажалатниинди бикIурахьа) гъийихдарин веледар Урусатдин вари вузариз, кадетарин училищйириз, Суворовдин ччвурнахъ хъайи военный училищейиз ва Нахимовдин ччвурнахъ хъайи военныйна гьюлин училищейиз экзаменар дарди кьабул апIиди. Тек яратмиш’валин пише ктабгъурайидари, саспи вузарик кучIвбан бадали, ахтармиш’валин ляхин тамам апIиди.

«Эскервалин гъуллугънаъ айидарин баяр-шубар вузариз кьабул апIбан къайдйир гьаму урхбан йислан ккебгъну лихиди. Президентдин Указдин гьяракатнакк Урусатдин вари вузар ккахьра. Вузарик кучIврайидар кьабул апIру кампания 2022-пи йисан 20-пи июндилан ккебгъру», – дупна Урусатдин образованиейинна илимдин министерствойин мялуматнаъ.

Дупну ккундуки, гьюкуматдин терефнаан тешкил апIурайи му кюмекнахьна регионариъ ва муниципалитетариъ чпин мумкинваларианра аьлава кюмек тувра. Улихьнаси Дагъустандин Глава Сергей Меликовди республикайиъ бицIидарин багъариз, мектебариз ва урхбан жара идарйириз Украинайиъ кIули гъябгъюрайи хусуси метлеб айи операцияйиъ иштирак шулайидарин баяр-шубар гъадагъруган, льготйир айи шартIар тешкил апIувал табшурмиш гъапIну.