БицIир дюн’яйиз гъафибси, завариин дугъан кьисмат дибикIну шулу, кIур. Аьхю гъахьиган, думу инсан фициб пишекарвалин рякъюъди гъягъюруш, бицIир саб тягьярнан яшнакк ккуркьиган мялумра, дугъан мумкинвалар ва зигьим ашкарра шулу. Гизафси дицдар касар чпин уьмрин рякъюъ аьхю хъуркьуваларихьнара гъюру, жвуван халкьдин дамагъра шулу.
Сар касди яратмиш’валин ляхин имбударихьан тафавутлуди кIули гъабхруган, кIури шулу: «Дугъаз Аллагьди тувну». Думу гьаци кIуру гаф вуки, дугъу чан гьевесниинди, устадвалиинди инсанарин юкIвариъ жумартвалин, инсан ккунивалин гьиссар уягъ апIуру. Гьацдар инсанарикан ву Муса Мягьямедовра (шиклиъ).
Муса Аьгьмедович Мягьямедов 1949-пи йисан 5-пи июндиъ Табасаран райондин Хянягъ гъулаъ бабкан гъахьну. 1956-пи йисан думу Хянгъярин ургуд йисандин мектебдин сабпи классдиз гъягъюру. 1963-пи йисан думу мектебдин ургубпи класс ккудубкIну, живанди Хючнаарин кьялан мектебдиъ урхуз хъюгъру.
Муса Мягьямедов бицIидихъанмина музыкайихьна гьевес айир вуди гъахьну. Чан зегьметнан рякъра дугъу 1967-пи йисан Табасаран райондин культурайин хулаъ лихбалан ккебгъну.
Советарин армияйин жергйириъ гъуллугъ дапIну кьяляхъ гъафи Мусайи чан ляхин культурайин цирклиъ давам апIуру: сифте автоклубдин заведующийди, хъасин каманчийиин мукьмар йивру аккомпаниаторди. Гьаци дугъу ццийин йисазкьан чан уьмрин 55 йис культурайин цирклиз бахш гъапIну.
«Дагъустандин радиойин Гъизилин фонднаъ» Муса Мягьямедовди ктагъу швнуб-саб мяъли а. Думу жюрбежюр конкурсарин гъалибчира ву. Муса Аьгьмедович Табасаран райондиъ гъахьи вари фестиваларин ва гьацира культурайин цирклиан райондиъ ва рес-публикайиъ кIули гъушу хайлин жара серенжемаринра иштиракчи ву.
Табасаран райондиъ ва республикайиъ мяълийир-мукьмариин юкIв алидариз Муса Мягьямедов бажаранлу устадси аьгъя. Дугъу бицIидихъанмина чан вари уьмур хабахъ каманчи хъади гьапIну. Муса Мягьямедовдин намуслу зегьмет жюрбежюр пешкешариинди, дипломариинди, гьюрматнан грамотйириинди лишанлу дапIна. 1996-пи йисан 21-пи августдиъ дугъаз «Дагъустан Республикайин культурайин лайикьлу гъуллугъчи» кIуру ччвурра тувну.
Жиниб дар, Муса Аьгьмедович Дагъустандин гизаф гъулариъ сумчрариъ музыка уйнамиш апIру кьавалдира гъахьну. Гьамусра каманчи дугъан варитIан ккуни музыкайин алат ву.
Табасаран райондин культурайин коллективдин арайиъ Муса Мягьямедовдиз лайикьлу гьюрмат а, думу жигьил артистарин насигьятчира ву. Му касдин инсанвалин хусуси лишнарикан улхуруш, умудлувалиинди пуз шулуки, сабпи нубатнаъ думу фурс ктру, аьхюр-бицIир аьгъю гьялал мусурман кас ву.
2022-пи йисан мартдин вазлиъ жвуван хушниинди аьрза тувну, Муса Мягьямедов ляхниан удучIвну, лайикьлу рягьятвал гъадабгъуз гъушну.
25-пи майдиъ Табасаран райондин депутатарин собраниейин сессияйиъ райондин глава Мягьямед Къурбановди, багъри культурайин цирклиъ гизаф йисари гъизигу бегьерлу зегьметназ лигну, Муса Мягьямедовдиз гьюрматнан грамота тувну.
