Мялум вуйиганси, апрелин эвелариан Урусатдин сяргьятариин хьадукран призыв гъабхувал кьувватнаъ ипна. Гъахурайи серенжемариз асас вуди, Хив ва Агъул районарин уьмуми военкоматдиан армияйин гъуллугъназ 60-ртIан артухъ жигьилар гьаувал лазим ву. Амма улупнайи вахтназ му жигьатнаан, хиял апIин, ерли йишвариин саб жюрейинра ляхин дубхнадар. Призывдин кьюбпи вазра ктабхъура, хъа гьелелиг эскервалин гъуллугъназ гьаънайир адар.

 

 

Аьгьвалат дигиш апIбан чарасузваликан улхури, улихьна йигъари райондин администрацияйиъ Хив райондин глава Ярмет Ярметовдин гюзчиваликкди тялукь совещаниера дубхна. Вушра, гьелелиг гьякьикьат архаин хьуз шлуб дар.

ЦIиб улихьнаси, мумкин вуйи вари рякъяр ишлетмиш апIури, дявдин гъуллугъназ гъягъюз гьязурди айи ихь жигьилари гъи гьаз му саягъ эскервалин гъуллугънаккан кIул ккадабгъура?!

«Улупнайи вахтназ эскервалин гъуллугъназ гьаъру яшнан 1100-тIан артухъ жигьилар гьисабнаъ айич. Дурарикан 700 кас Хив райондин вакилар ву.

Ляхин лазим вуйи саягъниинди гъабхуз зегьмет зигурача. Призывникариз саки вари гъулариъ вахтниинди военкоматдиз дих апIбан кагъзар тувна. Амма мялум вуйи ва мялум дару себебариан жигьилари му ляхникан кIул ккадабгъура. Гизафдар чиб яшамиш шулайи йишвариин алдрувалиан аьгьвалат хъанара читин шула.

Бязидари урхурайи йишвариан, тмундари чпин сагъламвал зяифуб вуйивал тасдикь апIбан тялукь справкйир хура.

Призывникарихьна ва дурарин абйир-бабарихьна илтIикIури, текрар апIураза: сад йисазди эскервалин гъуллугъназ гъурху саркьан жигьил Украинайин сяргьятариин кIули гъабхурайи хусуси метлебнан дявдин операция-йиъ иштирак шулдар. Му жигьатнаан гъаврикк ккаъбан фукьан сюгьбатар гъухишра, хайлиндариз гучI’вал ка. Ерли йишвариин гъаврик ккаъбан ляхин хъана жанлуди гъабхувал чарасуз лазим ву.

700 кас гьисабнаъ айи Хив райондиан майдин аьхирариз 6 жигьил армияйиз гъягъбанди ву. Хъа 60 кас лазим вуйи вахтна 6 кас …. », – кIура Хив ва Агъул районарин военком Пирмягьмад Къубачевди.