Урусатдин илимдин ва заан образованиейин министерствойи, Болонский гьяракатнакан кудучIвну, образованиейин жвуван хусуси гъурулуш дюзмиш апIбанди вуйивалин гьякьнаан къайд гъапIну.
«Болонский гъурулушдихьна ккудубшу деврихьнаси янашмиш духьну ккунду. Гележегдиъ ухьу аьнтIикьа, милли экономикайин игьтияжариин асасламиш дубхьнайи ва гьарсар студентдин мумкинваларин сяргьятар яркьу апIру ихь образованиейин гъурулушдиин биналамиш духьну ккунду», – гъапну РФ-дин илимдин ва заан образованиейин министр Валерий Фальковди.
ЦIийи гъурулушдиина улдучIвбан ляхин РФ-дин мярифатнан ва образованиейинна илимдин министерствйири сатIиди кIули гъабхбанди ву.
Улихьнаси Урусатдин хатIасузвалин советдин секретарь Николай Патрушевра образование-йин Болонский гъурулушдихьан гьудучIвбан теклиф хьади удучIвну гъулхну. Дугъан гафарин мяна гъадабгъури, къайд апIуз шулуки, гьамусяаьт Ригъ алабхъру терефнан уьлкйирин илимдинна образованиейин цирк-лиан урусатдин студентар ва мялимар ачухъди утIуккура. Гьаддиз РФ-дин Совбездин секретари «жвуван хусуси пишекрар гьязур апIбаъ дюн’яйиъ варитIан ужубсиб тажрубайихьна» хътакуз дих апIура.
РФ-дин Госдумайиъ ЛДПР фракцияйин кIулиъ айи Леонид Слуцкийдира, гьаму месэлайиан чан фикир ачухъ апIури, Болонский гъурулуш «урусатдин бицIидарин ва студентарин зиин гъубху ягъурсуз эксперимент гъабхьну» кIури, мялум гъапIну.
Болонский гъурулушдиз асас вуди, образование кьюб дережайиъди гъадабгъура: бакалавриат ва магистратура. Му дережйирилан гъайри, урусатдин образованиейин гъурулушдиъ специалитетдин дережайиъди 5-6 йисан образование тувбан асас программйириинди кадрйир гьязур апIувалра ими.
2024-пи йислан башламиш дапIну, заан образование гъадабгъбан цIийи пишйирин ва циркларин сиягь кьувватнаъ убчIвди. Дидиъ специалитетдиз артухъ фикир туври, бакалавриатдин ва магистратурайин программйир цIиб апIбанди ву.
Къайд апIуб лазим вуки, Урусат Болонский гъурулушдик 2003-пи йисан 19-пи сентябриъ кпикьнийи. Гьаддиз дилигди, милли игьтияжарин тIалаблувализ жаваб тувру кадрйир гьязур апIувалра уьбхюз гъабхьну.
