Редакцияйин коллективди 2022-пи йис «Табасарандин нурар» газатдин 90 йисандин юбилейин лишниккди гьапIра. Гьадму гьисабнаан неинки учуз, газатдин редакцияйиъ лихурайи журналистариз, хъа гьацира вари ихь халкьдиз, багъри культурайиз важиблу вуйи му гьядисайихъди аьлакьалу вуди учу жюрбежюр серенжемар гъахувал планламиш дапIнача, дурарикан варитIан асасдар цци чвну кIули гъягъиди. Газатдин машариъра цIийи – «Газатдин юбиле-йихьна», «Газатдин таяр» – рубрикйир ачмиш дапIну, дурариъ редакцияйиъ лихури гъахьи журналистарикан ва газат тешкил гъапIу девриъ бабкан гъахьи, чпин заманайин игитар ва кми-кмиди газатдин машариъ чпикан бикIури гъахьи жямяаьтлугъ касарин уьмрикан ктибтурача.
«Йирси газатар ккадаркури» кIуру нубатнан рубрикайин метлеб – газат урхурайидар ккудушу деврариъ газатдин редакцияйи гъабхури гъабхьи ляхнихъди, думугандин табасаран жямяаьтдин дидар-метлебарихъди, уьмрихьна вуйи лигбарихъди таниш апIувал, ихь халкьди ккадапIу рякъ улупувал ву.
Газат урхурайидар «Колхоздин уьмур» (гьаму ччвурнаккди газат 1938-пи йислан 1970-пи йисазкьан чапдиан удубчIвури гъахьну») газатдин 1952-пи йисан 5-пи декабриъ удубчIву 75-пи нумрайиъ «Зегьметкешарин кагъзар» рубрикайиккди тувнайи макьалйирихъди таниш апIуз ккундучуз. Дурар авторарин хатI ва чIалнан хусусивалар дигиш дарапIди туврача.
Гъайгъусуз руководителар
Хьубпи хьуд йисандин пландиъ колхозарин обществайин маларин кьадар артугъ апIивал ва дурарин бегьерлувал за апIивал улупна. Гьаму улупбар кIулиз адагъуз колхозарин правленйир ва малдарвалин къуллугъчйир мажбур ву.
Гьяйиф ки, ХустIил гъулан Чкаловдин цурнахъ хъайи колхоздин правление малдарвалин гьякьнаан айи ихь партияйин ва правительствойин саб жерге кьарарин гьеле бегьемди гъавриъ духьнадар.
Му колхоздиъ малариз кьюрдиз ужуб гьязурлуг гъабхбан ляхнариъ камивалар давам апIура. Колхоздин мал–мутму гьитIибкIдарин улихь йишв гьадабтIбан ерина, колхоздин правленияйи, ревизионный комиссияйи ва МТФ-йин заведующийди чпи думу ляхниъ иштирак апIура.
Гьаму улихьнаси, яккун госпоставкйир тувуз малар хъаъриган мурари юкьуд йисаъ айи саб чагъи жард гъулаъ гъитну. Колхозникарин хиял гъахьнуки, му жард колхоздиъ либхуз гъебтуб ву. Амма ляхин жара саягъ гъахьну. МТФ-йин заведующий Къурбанов Рамазну, колхоздин ревизионный комиссияйин председатель Ибрягьимов Ражабди ва правлениейин член Абдуллаев Аьзизди му жард дубккну чпиз харж гъапIну. Думу ляхниъ Колхоздин председатель юл. Мирзаевдира иштирак гъапIну. Гьамус дурари колхоздиз му жардран ерина саб кIари тувуз маслааьт дапIна.
Гьаму нукьсанар арайиан адагъуб, колхоздин жард тахсиркрарикан кадагъуб ва дурариз уьлчи бисуб лазим ву.
«Колхозник»
Активди лихура
АхьитI гъулан халичйир урхру артелин саб жерге дишагьлийири активди ляхин апIура.
Комсомолин членар вуйи Шихахмедова Аятди, Агъасиева Абиятди, Демирбекова Назлуйи ва жарадари халичйир урхбан йигъандин норма кьюбдири тамам апIура.
АхитI гъулан дишагьлийирин советдин председатель Демирбекова Зайнабди активди кюмек тувбиинди комсомол шубари артелин членарин арайиъ агитационно—массовой ляхнар яркьуди гъахура. Дурари ихь партияйин ХIХ— съезддин тарихи кьарарнакан сюгьбетар гъахури ва газетар урхури шулу.
АхитI гъулан халичйирин артелин членари – урхуз аьгъюдари варидари цIийи йисаз газетариз подписка гъухну.
Артелин членарин арайиъ тешкил дапIнайи агитационно—массовый ляхнари производствайин планар артугъдира тамам апIбаз аьхю кюмек апIура.
Б. Сефиханова
Пеэр артмиш апIуз фикир туврадар
Кюрягъ гъулан Молотовдин цурнахъ хъайи колхоздиъ (председатель юл. Абдуллаев Рамазан) пеэрин кьадар артмиш апIбаз аслагь фикир туврадар.
Эгер улихьна йисари колхоздиъ 400—кьан пеэр ади вуйиш, гьамус дурарин гьацIаркьан имдар. Мидин сабаб гьадму вуки, колхоздин правлениейи пеэр уьрхюз гъайгъу зигурадар. Пеэр гъайгъу дизригди малар аъру йишвариз маларигъди деетну шулу. Гьамус пеэр йицар аъру йишвариз деетна. Гьамциб гъайгъусузвалин нетиже вуди пеэрилан колхозди гъадагъурайи хайиртIан дурариз aпlypaйи харжар саб швнуб ражари гизаф ву.
Пеэр уьрхбаз фикир тутруврувал ухди арайиан адагъну ккун.
А.Къурбанов
«Гъямер» гьяйван набшди?
Арак гъулан Уллубиевдин цурнахъ хъайи колхоз ухдитIанмина ужудар гьяйвнарин илхи айи колхоз ву. Дурар гьар йисан «Тумаев» кIуру ятгъиин беслемиш aпIyрай. Гьамус му ятагъра колхоздин ихтиярнаъ имдар. Душваз гъягъюри—гъюри колхоздин 1500 манаттIан зиина пулра харж дапIна.
Колхоздин правлениейи гъулаъ гьяйвнариз ужуб шараит дерккбаз, дурарин гъайгъу зигбаз ахир вахтари цIибтIан фикир туврадар.
Сентябрин вазлиъ АхьитI гъулаз сумчриз чав элеъну гъушу «Гъямер» кIуру гьяйван колхоздин председателин заместитель Гьясратаьлдихьан гъабкIну. Колхоздиз туву гьаму зарал дибуз гъитбан ерина, колхоздин правлениейи му ляхин илибкну гъетна.
Колхоздиз зарал тувдарин улихь йишв гьадатIуб лазим ву.
(Ич мухбир)
Урхбан ва тербияйин ляхнарин дереже за апIну ккун
Бургьан – кент гъулан детдомдин воспитанникарин арайиъ урхбан ва тербияйин ляхнар гьеле заан дережейиинди тешкил дапIнадар. Сабпи кварталин итогариан мяълум шулуки, саб бяъзи группйириъ (сабпи группайиъ) аьгъюваларин дереже 50—60 процентдилан зиина дар. Аьгъюваларин дереже мукьан асина хьпан сабпи сабаб воспитанникар урхру ва бикIру материаларихъди бегьемди тяъмин дарапIивал ву.
Детдомдиъ айи баяр-шубарин арайиъ тербияйин ляхин мюгькем апIбаз саб бяъзи воспитателар гизаф кагьалди лигура. Мисал вуди сабпи группайин воспитательница М.Николаевна гъадагъуз шулу. Мугъу воспитанникариз лазим дару гафар апIбиинди тербияйин ляхнар чав чIур апIури шулу, бицIидарихъди ужуб аьлакьа уьбхюри ва дурар коммунист тербияйиинди тербиялу апIбаз гьяракат апIурадар.
Детдомдиъ урхбан ва тербияйин ляхнар къайдайиз хпан бадали директори ва завучди лазим вуйи уьлчйир агуб лазим ву.
Р.Аьликъулиев
