«Игитарди бабкан шлуб дар.
Дурар уьмри арайиз хуру»».
Гъийин йиз макьала нубатнан кьягьяликан, Ватанди чан улихь дивнайи вазифйир игитарин цIарнаъди намуслувалиинди кIулиз адагъури, Урусатди Украинайиъ кIули гъабхурайи хусуси метлеб айи дявдин операцияйиъ жюр-этлувалиинди чан жан фида гъапIу Гюлмягьямад Къалабеговдикан ву.
Гюлмягьямад 1992-пи йисан 6-пи майдиъ Дагъустан Республикайин Хив райондин Мажвгул гъулаъ Гьясан ва Наизат Къалабеговарин хизандиъ бабкан гъахьну. Дурарин юкьур велед айи хизандиъ Гюлмягьямад сарпир ву.
2009-пи йисан Мажвгларин кьялан мектеб ккудубкIну, ЕГЭ-йиан лазим вуйи кьадар баллар гъадагъну, гьадму йисан думу Пермь шагьриъ ерлешмиш дубхьнайи заан военный командный училищейик урхуз кучIвуз гъягъюру. Гьамушваъра вари имтигьнар ужудар натижйириинди тувнушра, конкурсдин комиссияйи «ликрин гапнан кьуливал» кIуру багьна кипну, бай училищейиз кьабул гъапIундайи.
Багъри гъулаз хъадакну гъафи Гюлмягьямад, аьрза дибикIну, жвуван хушниинди армияйиз гъягъюру. Армияйиъ сержантар гьязур апIру школа ккудубкIну, сад йисна гьацIан арайиъ чан буржи лазим вуйи къайдайиинди тамам дапIну, думу хулаз аьхюну сержантди гъафну. Дугъан кеспи минометный ротайин пулеметчик вуйи.
2012-пи йисан эвелиъ Гюльмягьямад республикайин меркездиъ ерлешмиш дубхьнайи 102-пи бригадайиъ контрактдиинди гъуллугънаъ учIвру ва гьадму йисан аьхириз Астрахань шагьриъ тешкил дапIнайи Росгвардияйиз перевод апIуру. Гьамци, ватан уьбхру гъуллугъниин байвахтнахъанмина юкIв али Гюлмягьямадди чав кадабгънайи рякъ хушниинди ва аьшкьниинди давам апIуру.
2018-пи йисан дугъаз прапорщикдин званиера тувру. Чан кьатI’и агъювалариз, вахтниинди документация абцIбаз, улупнайи вазифйир жавабдарвалиинди тамам апIбаз лигну, 2020-пи йисан Гюлмягьямад дявдин машинарин складдин начальникди тяйин апIуру.
2021-пи йисан Крымдиъ кIули гъушу Урусатдинна Белоруссияйин ученйириъ Гюлмягьямадди чан заан иштирак’вал улупуру, ва думу «Дявдин гьязурлугвалин отличник» кIуру медалин сагьиб шулу.
Гъябгъюрайи йисан 24-пи февралиъ ккебгъу хусуси метлеб айи операцияйиъ далу тямин апIуз гъушу Гюлмягьямад, чан командир уьрхюз чалишмиш шулайир, Мелитополь шагьрин багахь 9-пи мартдиъ самолетдиан гъиву снаряддин тики кубкIну, талаф гъахьну. Думу багъри гъулаъ архаин гъапIну.
Гюлмягьямад хусуси метлеб айи операцияйиъ иштирак’вал апIуз гъушу сифте йигъариланмина душваъ гъийиху ихь баярин майтар багъри ругариина хътаъбаъ, хъа зийнар гъахьи баяр аьзарханайиз рякъ’ин апIбаъ улихь-кIулихь хьади гъахьнийи. Дидкан ухьуз гьадму рякъ’ин гъапIу баяри рякъ-хулиъ алахъган, бизар дарди текрар апIури, сюгьбатариъ ктибтура, ва Гюлмягьямад Аллагьдин рягьматдикк ккаъри, гъакIи накьвдиъкьан чIур дархьувал ккун апIура.
2015-пи йисан Гюлмягьямадди багъри гъулан риш Бесмирайихъди хизанра ккебгънайи. Дурариз Гъазали кIуру жили веледра айи.
Гъазалийин йирхьуд йистIан дар, амма адашдин игитвал дугъу гьисс апIура гъапиш, узу гъалатI даршул. Фицики, 9-пи майдиъ гъабхьи «Аьжалсуз полкнаъ» адашдин шикил хьади, кIулра хъазабгну, солдтин кIалбариз, даркбариз, лицбаз ухшар ади, иштирак шулайи балин юруш гъябкъю касари думу субут ва тасдикь апIуру.
2022-пи йисан 23-пи майдиъ Хив райондин глава Ярмет Ярметовди Владимир Путиндин къарарниинди прапорщик Гюлмягьямад Къалабеговдиз тувнайи Кьягьялвалин орден дугъан дада Наизатдихьна ва уьмрин юлдаш Бесмирайихьна гъурубкьну.
Дюн’яйиин ислягьвал, инсанарин арайиъ манишнан ялав ккунди гъушу Гюлмягьямад ихь арайиъ ва юкIвариъ гьаммишан чIивиди гъузди.
