Йислан-йисаз Дагъустандиз гъюрайи туристарин кьадар артухъ шула, гьаддихъди сабси республикайиъ ачмиш апIурайи туристар гъюгъру маршрутарин кьадарра. Дагъустан Республикайин трансапортдинна рякъярин мяишатдин министерствойи туристар гъягъюрайи терефарин машинар гъягъру рякъяр рас ва дурариз хъайивал апIувал – сабпи нубатнаъди, гьял дапIну ккуни асас месэласи гьисабназ гъадабгъна.

 

Министерствойин пресс-гъуллугънаан тувнайи мялуматаринди, му месэла гьял апIбан бадали, республикайин 21 муниципалитетариъ туриствалин йишварихьинди вуйи рякъярин 28 объектдиин расвалин ляхнар кIули гъягъюра. Гьадму гьисабнаъ Кьибла Дагъустандин Дербентдин кластерихьна, Шалбуздагъдихьна ва Хянгъярин Рибчрарихьна вуйи рякъярра а. Гьаму жюрейин ляхин 2023-2024-пи йисари туристар гъягъюрайи хъанара 16-сан йишварихьинди рякъяр рас апIбиинди давам хьиди.

Мидланра гъайри, тувнайи мялуматариинди, республикайин транспортдинна рякъярин мяишатдин министерствойи муниципалитетарихъди сатIиди ляхин дапIну, цци рас дапIну ккуни туриствалин цирклин объектарихьинди гъахурайи рякъяринна кючйирин участокарин сиягь гьязур дапIна. Дурарин кьадар 105 ву.