Санкцйирин харживалиъ уж’валра адарди дар. Му аьгьвалатнаъ ихь гьюкуматдин дуланажагъдин саспи цирклар аргъаж шлу шартIар арайиз дуфна. Мисалназ, Урусатдин жюрбежюр пIипIариз, гьадму гьисабнаан Дербентдизра, гъюрайи туристарин кьадар йигълан-йигъаз артухъ шула. Аьхюну пай туристари Алупка (Крым), Лоо (Сочи), Пятигорск, Сортавала (Карелия), Горно-Алтайск, Кировск, Владикавказ, Дербент, Плёс (Ивановский область) ва Стерлитамак (Башкирия) гъядягъюра, ва цци хьадну Урусатдиъ асас вуди иша гъягъюрайидар фитнес-турар ву, къайд апIура туризмдин цирклиъ лихурайидари. Янаки рягьятвал гъадабгъру йишвариз гъягъюрайидариз, марцци гьавайихь дагълариъ, гьюлерин гъирагъарихъ артухъси ликри лицури, ядиграриз ва гюрчег йишвариз лигуз шлу жюрейин сиягьят кьабулди а. Гьаци дурариз чпин сагъ’вал ужу апIуз ва жандин артухъди айи килограммарихьан азад хьуз ккунду. Туристариз кьабул вуйи шартIар ади хьпаз дилигну, цци хьадну Алупкайиз, Лоойиз ва Пятигорскдиз гъягъюз вахт ккимиди аьхю кьадар йишвар дидисна, кIура мялуматариъ.
Пятигорск, Владикавказ ва Дербент артухъ харжар дарапIди рягьятвал гъадабгъуз варитIан гъулай йишвар вуди гьисаб апIура. Хъа туристариз варитIан багьади Сортавала алабхъура.
Дербентдикан улхуруш, мушваъ гьар гьяфтайиъ саб дарш саб аьдатнан дару серенжем гъябгъювал аьдатнаъ абхъна. Мисалназ, ккудушу киш ва элгьет йигъари (28-29-пи майдиъ) Нарин-гъалайиин улихьдин автомобиларин выставка кIули гъубшну. Кюгьне гъалайиз Урусатдин жюрбежюр шагьрариан дюн’яйиъ лап цIибдитIан имдру 60 машин уч гъапIну. Аьхюну пай машинар Москвайианна Санкт-Петербургдиан хъаънайидар вуйи. Выставкайиз лигуз, ерли шагьристанарси, вари Дагъустандианра, гъирагъдилан дуфнайидарра уч гъахьну. Машинариин юкIв алидари чиб гизаф тясирлу гьядисайиъ иштирак гъахьиганси гьисаб апIура. Му жюрейин серенжемарира туристарин Дербентдиз гъюбахьна вуйи турагентствйирин иштагь артухъ апIура.
