Урхбан йисан аьхириз баяр-шубарра, мялимарра, бицIидарин абйир-бабарра ккилигури шулу: садар — жавабдарвал айи экзаменарин вахт гъюбахьна гьязур шули, тмунудар – рягьятвал гъадабгъру вахтнахьна хъуркьуз гьялакди. Мектебариан деетбан классар ккудукIдар, гьамусяаьт ОГЭ ва ЕГЭ туври, гъизгъин гьялнаъ а, хъа бицIи ва кьялан классариъ айи баяр-шубар хьадан тятIиларин азад берейиз удучIвна.

 

Дербент шагьриъ тятIилар ккергънайи бицIидариз 6-пи июндиъ юкьуб мектебдин (9-пи, 11-пи, 12-пи, 15-пи нумрйирин) йишвариин рягьятвал гъадабгъру лагерар ачмиш гъапIну ва му йигъаз бахш дапIнайи серенжемар кIули гъушну. 16-пи июндиъ шагьрин 21-пи нумрайин мектебдиъра сабсан лагерь абццди.

Дербентдин администрацияйин главайин заместитель Видади Зейналовдин гафариинди, шагьриъ лагерариз гъадагъурайи баяр-шубарин кьадар сачтIан цци 20 процентдин артухъ гъабхьну. «Лагерари 21 йигъан кьюб сменайиъ ляхин апIиди, – гъапну гъуллугъчийи. – Гьамусяаьт вари лагерар бицIидари ацIна. Гьацира республикайиъ шагьрарин гъирагъдиъ айи лагерарра лихура. Дурариз гъягъюз ккунидарихьан чиб МФЦ-йиъ сиягьдик кауз шулу».

Лагерарин ляхин тешкил апIурайидарин гафариинди, бицIидариз йигъан кьюб ражари убцру хураг ва лисхъан ушв гьибтруб гьиври хьиди; баяр-шубариз спортдин ва сяняаьтарин школйирихъди ва колледжарин студентарихъди аьлакьайиъ ади аьхю кьадар серенжемариъ иштирак хьуз, мяналуди вахт адапIуз мумкинвал тувди.

Дупну ккундуки, Дербент шагьрин администрацияйин идарайиккди бицIидарин ва жигьиларин сагъламвалин дережа за апIбан ва дурариз рягьятвал гъадабгъру шартIар тешкил апIбан хусуси жюрейин программа либхура. Думу 2021-2023-пи йисари кIулиз адабгъуз планламиш дапIнайиб ву. Шубуд йисандин арайиъ бицIидарин лагерариз гъягъру баяр-шубарин кьадар гужалди артухъ апIбанди ву. Мектебариъ тешкил дапIнайи ва шагьрин гъирагъдиъ айи лагерариз сабпи нубатнаан кюмекназ ккилигурайи, аба вая баб адарди гъузнайи, хил хътрубкьрайи хизанариан вуйи бицIидар гъадагъура.