Улихьна йигъари Федеральный цIа кабхъбаз аькси агъювалар гъадагъру гъуллугънан Москвайин центрин «Инфолайн» колледждин сабпи курсназ урхуз дуфнайи 360 студентдихьан МЧС-дин жергйириз кьабул апIруган присяга гъадабгъбан серенжем кIули гъубшну. Думу серенжемдиъ ихь ватанагьли, Государствойин Думайин депутат Ризван Къурбановдин кюмекчи, Гиннессдин китабдиъ айи рекордар диву спортсмен Рустам Бегеринра иштирак гъахьну.
Рустам Бегеринди «Табасарандин нурар» газатдиз туву мялуматариинди, тазади урхуз гъюрайи курсантарихьан пишекарвалин аьгьт кьабул апIури, магьа дугъан швнуд-сад йис ву. Му дюшюшдин гьякьнаан дугъу гъапиганси, Федеральный цIа кабхъбаз аькси агъювалар гъадагъру гъуллугънан Москвайин центрин колледждиз урхуз дуфнайи курсантар му чпин уьмриъ жавабдар гьядисайихьна ужуди гьязур духьнайи. Вари Урусатдин МЧС-дин гъурулушдиъси, гьамшваъра хабарсуз инсанар кьабул апIурадар.
«Курсантарикан гьарур чан уьлкейин ватанпервер ву. Гьаддиз дурар му гъуллугъназ жвуван хушниинди гъюру. Узура Урусатдин МЧС-дин училищейиъ гъурхур вуза, ва Москвайин МЧС-диъ гъуллугънаъра гъахьунза. Фукьан вушра гъагъи вакъиъйириъра иштирак гъахьунза. Гьаддиз урхбаъ гъадагъу аьгъювалар му гъуллугънаъ чарасуз лазим вуйивалихъдира ужуди таниш вуза. Гьарсар курсантдихьинди илтIикIну, пуз ккундудуз, учвуз туврайи аьгъювалариз шлубкьан артухъди фикир тувну, дурар гьаммишандиз фагьмиъ уьрхюб лазим ву», – гъапну Рустам Бегеринди серенжемдиъ.
Йиз сюгьбатчийи мялум гъапIганси, мина гьар йисан Дагъустандианра хайлин курсантар гъюра. Йислан-йисаз дурарин кьадарра артухъ шула.
«Сачра, ццира ихь республикайиан мина урхуз дуфнайи курсантарихьан ху апIувал кьабул гъапIур узу вуза. Табасаран ва Хив районарианра хайлин касар гъюра. Гъит дурариз варидариз урхбаъ хъуркьувалар ишри», – аьлава гъапIну Рустам Бегеринди.
Гьар йисан му серенжемдиъ иштирак хьпаз, «Инфолайн» колледждин курсантар чпи кадабгънайи пишейин гъаврикк ккаъбаз ва бицIидаризна жигьилариз ватанпервервалин тербия тувбаз лигну, Урусатдин МЧС-дин Москва шагьрин кIулин управлениейин ветеранарин советдин председатель, генерал-майор Леонид Коротчикди Рустам Бегерин гьюрматнан кагъаз тувбиинди лишанлу гъапIну.
