Инсандин уьмрин рякъ фициб шулуш, саризра мялум дар. Фуну вахтна вушра уьзур кивуз, бабкан шлуган уьзур кади хьуз, хатIалу дюшюшнакк ккахъуз мумкинвал а. Гизаф дюшюшариъ духтрари сагъ’вал хъайи инсанарин ифдин кюмекниинди жюрбежюр уьзрар сагъ апIуру. Дицисдар инсанар ихь арайиъра гизаф а.
Чпин ифи жара инсандин уьмур уьбхюз тувру инсанариз чухсагъул мялум апIури, гьар йисан 14-пи июндиъ Варидюн’яйин донорин йигъ тяйин дапIна. Урусатдиъ апрелин 20-пи йигъан Донорин милли йигъра къайд апIуру. Донорин йигъан медицинайин хусуси метлеб айи идарйири жямяаьтлугъдин фикир инсандин ифи гизаф лазим вуйивалиина, думу кьитдитIан адрувалиина жалб апIуру.
«1832-пи йисан бицIир бабкан хурайи дишагьлийин гизаф ифи гъубшнийи ва думу йикIру гьялнахъна гъафнийи. Акушервалин жигьил духтир Андрей Мартынович Вольфди гъагъи гьялнаъ айи дишагьлийиъ ифи убзуз йикьрар апIуру. Думуган чан жилирин ифи убзу дишагьли сагъ шулу», — мялумат тувра бязи китабариъ. Гьаддихъанмина духтрари ифи убзбан тажруба хъуркьувалиинди ишлетмиш апIура.
Июндин 10-пи йигъан Мягьячгъалайин кьялан майдандиин тешкил дапIнайи донорвалин акцияйин дахилнаъди, Урусатди Украинайиъ гъабхурайи хусуси метлеб айи дявдин операцияйиъ иштирак шулайи ихь эскрарин гьюрматназ ифи тувуз 100-тIан артухъ инсанар уч гъахьнийи. Ич редакцияйин вакиларра гъирагъдиъ гъузундар.
«Узу Дагъустандин СМИ-йин вакил вуза, йиз ифи 4-пи отрицательный группа вуйиз. Ифи сабпи ражари тувраза. Украинайиъ нацистарихъди женгнаъ зийнар духьну, больницйириъ айи ихь жигьилариз, аьзарлу духьнайи бицIидариз кюмек апIуз ккундузуз. Белки, йиз ифдин кюмекниинди духтрари фуж-вуш аьажликкан ккадагъур. Йиз ифдин гьарсаб цIадал гьялал апIураза. Ихь халкьдин арайиъ кIуруганси, думу ифи кубкIуриз дидкан ургуб дарман ишри!» — гъапну ич сюгьбатнаъ Наргиз Гюлечовайи.
Гьар йисан ихь уьлкейиъ саб миллионна гьацIтIан артухъ инсанариз ифи лазимди шулу. Ифи ва дидкан апIру дармнар ифдин дамарин уьзрар кайи инсанариз лазим ву. Дурарин арайиъ аьхю кьадар бицIидарра а. Ифи улигьди айи гьялназ хуз гъитру дармнар бицIидар бабкан гъахьи дишагьлийириз, аварияйикк ккахъну, гизаф ифи гъубшу инсанариз лазим ву.
Донор – жара инсандиз сагъу уьмрин рякъюз гъюз кюмек тувру, ужуб юкIв айи инсан ву. Ихь уьлкейиъ донорариз ужуб гьюрмат ва гьюкуматдин терефнаан льготйир а. «Гьюрматлу донор» кIуру ччвур тувбан бадали, кьюб-шубуб ражари ифи тувувал цIиб ву. 40 ражаритIан артухъ, кьялан гьисабниинди 21 литр, ифи тувдарикан «Гьюрматлу донорар» шулу.
