Цци Дагъустандиъ хьадукран тумар урзуз гьязур дапIнайи 225 агъзур гектарин хутIлариъ кIули гъахурайи ляхнар аьхирихъна гъюра. Му кьадар сачтIан 15 агъзур гектарин артухъди ву кIури, республикайин гъулан мяишатдин ва ипIру-убхъру сурсатарин министерствойин пресс-гъуллугънан начальник Мягьямед Аьбдуллаевди «Табасарандин нурар» газтдиз хабар тувну.
Къайд апIуб лазим вуки, цци ихь гьюкуматдиин санкцйир иливнайивал себеб вуди, Урусатдин гъулан мяишатдин министерствойи ухьухь гьясил апIурайи итIру сурсатарин кьадар артухъ апIбан вазифа улихь дивнайивализ лигну, Дагъустандиъ гьясил апIурайи мейвйирин, асас вуди картфарин, кьадар хайлин артухъ гъапIну. Яна гьаму йисан мейвйир киву хутIларин кьадар 2 агъзур гектарин, хъа картфар киву хутIларин кьадар — 1500 гектарин артухъ гъапIну.
Варидиз мялум вуйиганси, Дагъустандин дюгюра ужуб ад айи, варидари хушниинди ишлетмиш апIурайи дюгю ву. Республикайи дюгю гьясил апIбаанра гьар йисан ужудар натижйир улупура. Министерствойиан туврайи мялуматариинди, гъябгъюрайи йисан 28 агъзур гектарин хутIлариъ дюгю убзиди. Гъийин йигъаз саки 27 агъзур гектариъкьан дюгю дубзну ккудубкIна, имбуну хутIлариъ штар ирчна.
«Гьаму йигъари мягьсулар ургузра хъюгъди. Цци респуб-ликайиъ 93 агъзур гектариъ тахил дубзна. Бегьерра ужуб ккадабцIиди.
Гьаддихъди сабси кьюрдуз алафарра уч апIуз хъюгъна. Гъийин йиъаз 215 агъзур тонна алафар гьязур дапIна.
Йимишарин гьякьнаан кIуруш, йислан-йисаз киврайи багъларин кьадарра артухъ шула. Мисал вуди гъадабгъиш, цци хьадукран вазариъ региондин муниципалитетариъ 740 агъзур гектариъ цIийи багълар итну. Думу кьадар гьаму йисаз планламиш дапIнайибдикан 82% ву»,- гъапну министерствойин пресс-гъуллугънан начальник Мягьямед Аьбдуллаевди.
Аьхириъ сюгьбатчийи къайд гъапIганси, Дагъустандин экономикайин артмиш шулайи цирк-ларикан саб вуйи АПК-йин цирк-лиъ ужудар натижйир улупбан бадали, цирклин вари терефариз гьюкуматдин терефнаан, цIибди вушра, кюмек апIура. Гьаддиз ужудар натижйирра шула.
