Июндин 15-пи йигъан Санкт-Петербург шагьриъ Петербургдин варихалкьарин экономикайин форум ачмиш гъапIну. Думу форумдиъ чпин инвестицйирин проектарикан ктибтуз, гьацира жюрбежюр йикьрар йитIуз Урусатдин вари регионариан ва дюн’яйин 140 уьлкейиан вакилар уч духьна. Дагъустандин делегацияйин кIулиъ айир респуб-ликайин Глава Сергей Меликов ву. Форумдиъ сабпи ражари вуди консультацйир ва гюрюшар гъахру Дагъустандин стендра ачмиш дапIна. Стендди республикайин варитIан машгьур, аьжайиб вуйи Дербентдин Гъала лишанлу апIура. Гьацира душваъ Дагъустандин тIумутIчивалин ва улихьди харижи уьлкйириан хурайи шей’ар республикайиъ гьязур апIурайидарихъди гьюдюхюз айи мумкинвалар улупна.
2022-пи йисан гъабхурайи ПМЭФ-дин асас тема «ЦIийи дюн’я — цIийи мумкинвалар» ву. Думу форумди экономикайин цIийи чешне арайиз хру дюн’яйиъ духьнайи аьхю дигиш’валар улупура.
Форумдин дахилнаъди Дагъустан Республикайин делегацияйи экологияйин, илимдин, финансарин гъурулушдин, телекоммуникацйирин, рякъярин инфраструктурайин, культурайин, туризмдин ва гьацдар жара цирклариъ аьлакьйир тешкил апIбан гьякьнаан 15 йикьрар йитIбанди ву.
Форумдин садпи йигъан Дагъустандин Глава Сергей Меликовди ва «Урусатдин экологияйин оператр» ППК-йин генеральный директор Денис Буцаевди региондин аьтрафарилан хъархъсар марцц апIбан гьякьнаан йикьрар гъийитIну. Къайд апIувал лазим вуки, мянфяаьтлуди хъархъас марцц апIувал – республикайин гьюкмин органарин улихь дийигънайи асас месэлйирикан саб ву.
Дагъустандин Глава Сергей Меликовди, ПМЭФ-дин садпи йигъандин натижйир йивури, къайд гъапIну: «Урусатдин экологияйин операторихъди, республикайин аьтрафариин уч шулайи хъархъсикан гьапIруш, йикьрар гъийитIунча. Республикайиъ хъархъас тартиб апIру 3 комплекс тикмиш апIуз гьязурди ахьа. 2024-пи йисаз Дагъустан федеральный проектдин метлебнан улупбарин улихь хьайи регионарикан саб хьибди.
Роскачествойихъдира йикьрар гъийитIунча. Думу идара ихь респуб-ликайиъ гьясил апIурайи сурсатдиз лайикьлу йишв тувуз шлу мюгькам партнер ву».
Экономикайин форумдиъ Дагъустан Республикайин делегацияйи ВТБ банкдихъди, «Сбербанк» ПАО-йихъди, «Газпром» компанйирин дестейихъди, «РЖД» ОАО-йихъди йикьрар йитIиди.
