Мялум вуйиганси, 10-пи июндиъ, Урустадин йигъан машкврин гъаншариъ, РД-йин Глава Сергей Меликовди ихь уьмрин жюрбежюр цирклариъ тафавутлу гъахьи дагъустанлуйириз Урустадин Федерацияйин ва Дагъустан Республикайин гьюкуматдин наградйир тувбан серенжем кIули гъубхну.
Гьюрматлу ччвурар, орденар ва медалар тувдарин, чухсагъул мялум апIбан кагъзариинди ва гьюрматнан грамотйириинди лишанлу гъапIдарин арайиъ образованиейинна сагъламвал уьбхбан, культурайинна спортдин, тикилишчивалинна энергетикайин, транспортдинна ЖКХ-йин, агропромышленный комплексдин вакилар, гьар йигъан чпи зигурайи фидакар зегьметниинди метлеблу натжийирихъ хъуркьрайи ва ихь республика артмиш апIбак жвуван лайикьлу пай киврайи касар айи. Саб гафниинди, му йигъан машкврин серенжемдиз уч гъахьи ихь ватанагьлийир чпин фагьумлувалиинди, ватанпервервалиинди, зегьмет зигуз ккунивалиинди, марцциди ва жавабдарвалиинди гъуллугънан вазиф-йир тамам апIувалиинди, инсандин гъайгъу зигувалиинди, жигьил наслиз тербия тувувалиинди, жумартвалиинди ихь уьлкейин машгъурвал артухъ, хъурхъувалар гъазанмиш апIуз мумкинвал туврайидар ву кIури, къайд апIуз шулу. Гьамцдар гьюрматлу касарин арайиъ табасаран халкьдин вакилар айивали ухьу шадра апIура, дамагълура хьуз гъитра.
Му йигъан Сергей Меликовди гьюкуматдин наградйир туву касарин арайиъ ихь ватанагьли, РД-йин Счетный Палатайин аудитор Бейдуллагь Мирзоевра айи. Думу «Дагъустан Республикайин яшайишдинна экономикайин артмиш’валик пай кивбаз лигну» медаль тувбиинди лишанлу гъапIнийи.
Бейдуллагь Гьяживердиевичдиз му медаль, хайлин йисари жюрбежюр гъуллугъариъ лихури, гъадагъу заан хъуркьувалариз ва регион артмиш апIбак киву аьхю пайназ лигну, тувуб вуйи.
«Узуз, республикайин маракьар уьрхюри, экономика мюгькам апIури, гъийин йигъан Дагъустандиз метлеблу ва важиблу месэлйир гьяла пIури, хайлин йисариинди Бейдуллагь Гьяживердиевичди гъабхурайи ляхниз чухсагъул мялум апIуз ккундийзуз», — къайд гъапIнийи РД-йин Главайи, Бейдуллагь Мирзоевдиз награда туври, ва дугъаз гележегдиъра ватандин хайирназ зегьмет зигбаъ хъурхъувалар ккун гъапIнийи.
Бейдуллагь Мирзоевдиз РД-йин Главайин мициб заан нагрда тувувал – дугъан пишекарвалин заан устадвал, Дагъустан Республика яшайишна экономика жигьатнаан артмиш ва авадан апIуз дугъу вафалуди ва жанлуди зегьмет зигурайивал тасдикь апIувал ву.
ИкибаштIан, му хъуркьувал Бейдуллагь Мирзоевдин хайлин йисари жюрбежр гъуллугъариъ баркаллувалиинди гъизигу зегьметнан натижа ву.
Къайд апIурача: Бейдуллагь Мирзоев Хив райондин Заан Ярак гъулаъ бабкан гъахьну. Дугъу чан асас кьувватар ва зигьим багъри райондин гъулар артмиш апIувализ бахш гъапIну гъапиш, кучIал шулдар. Сифте райондин идарйириъ жюрбежюр жавабдар гъуллугъариъ, кьяляхъна Хив райондиъ айи государствойин налогарин инспекцияйин отделин начальникди, пенсйирин фонднан отделениейин начальникди, финансарин управлениейин руководителди, райондин главайин сарпи заместителди, хъа 211-2018-пи йисари Хив райондин главади лихури, дугъу райондин артмиш’валин рякъюъ лайикьлу шил гъибтну. 2019-пи йисан февралин вазлилан мина дугъу РД-йин Счетный Палатайин инспекцияйин начальникди, хъа ккудубшу йислан мина душваъ аудиторди зегьметнан рякъ давам гъапIну.
«Табасарандин нурар» газатдин редакцияйин коллективдин терефнаан Бейдуллагь Гьяживердиевич му заан награда тувбахъди тебрик апIури, дугъаз мюгькам сагъ’вал, гележегдиъра вари Дагъустан, Урусат артмиш апIуз зегьмет зигбаъ хъана аьхю хъуркьувалар ккун апIурхьа! Гъит ягъурнан ишигънаккди уьмрин рякъ ккадапIурайи вакилар ухьуз артухъ ишри!
P.S. Зиихъ къайд дапIнайи серенжемдиъ хъана ихь ватанагьлийир – «Дербентдин коньякар гьясил апIру комбинат» АО-йин генеральный директор Загьирбег ТIайибов ва «Дагъустандин ялхъвнарин академияйин лайикьлу ансамбль «Лезгинка» РД-йин ГБУ-йин балетдин артист Жамиля Мамедова – лишанлу гъапIну. Дурарикан макьалйир газатдин гъюру нумрйириъ чап апIидича.
