Гьаму йигъари Дагъустандиан Донбассдиз хьубпи, амма варитIан аьхю кьадарнан рягьимлувалин кюмек гъабхбан бадали, 500 тонна итIру сурсатар ади 26 фура машинар рякъюъ учIвну. Рягьимлувалин кюмек уч гъапIу асас тешкилатчи рягьимлувалин фонд «Инсан» ву.
Думу фонднан генеральный директор Мягьямедра-сул Аьгьмедовди мялум гъапIганси, гьаму ражарира рягьимлувалин кюмек асас вуди чарасуз лазим вуйи ва итIру сурсатарикан ибарат шула. Гьадму гьисабнаъ хю, шекер, дюгю, гречка, макаронар, семечкйирин ччим, убхъру шид, алахьру палтар, дармнар ва марццишин апIру вахтна лазим шлу алатар а.
«Уьмуми гьисабариинди, гьаму ражари Донбассдиз 26 машин гъушну. Дурарикан 14 машин Мягьячгъалайиан, хъа имбу 12 – республикайин жара шагьрариан – Къизлариан, Хасавюртдиан, Къизилюртдиан ва гьацдар жарадариан ву. Рягьимлувалин кюмек уч апIбан серенжемариъ Дагъустандин шагьрариан ва районариан вари халкь иштирак гъахьну. Дурари, итIру сурсатаринси, финансарин терефнаанра кюмекар тувна. Кюмекнан хил гьачIабккурайидарин арайиъ хайлин меценатарра а. Дурар, дявдин хусуси метлеб айи операция ккебгъу сабпи йигълан хъюгъну, учу думу терефназди рягьимлувалин кюмек апIбаз даягъ шулачуз», – гъапну М. Аьгьмедовди.
КIваин апIуз ккундучуз, улихьна вазариъ фондну 4 этапдиъди 11 лап аьхю машинар 300 танна рягьимлувалин кюмек ади Донбассдиз гьаъну.
Улихьдиси гьаму ражарира рягьимлувалин кюмек гъабхурайи 26 машин къанун уьбхру органарин гъуллугъчйирин гюзчиваликкди гъушну. Улупнайи йишваъ думу машинар ва ихь делегация ДНР-ин администрацияйин вакилари къаршуламиш апIиди.