20-пи июндиъ Каспийск шагьриъ ерлешмиш дубхьнайи «Анжи Арена» стадиондин аьт-рафариин Украинайиъ гъабхурайи хусуси метлеб айи операцияйиъ гъакIи Урусатдин Игит ва спортдин мастер Нурмягьямед Гьяжимягьямедовдин ччвурнахъ спортдин гизаф жюрйириин машгъул хьуз мумкинвал айи центр ачмиш гъапIну. Спортдин центр ачмиш апIбан серенжемдиъ Дагъустан Республикайин Глава Сергей Меликов, республикайин спортдинна физический культурайин министр Сажид Сажидов, Игитрин адаш Энгельс Гьяжимягьямедов ва жара касар иштирак гъахьнийи.
Серенжем ачмиш апIури, рес-публикайин Главайи Нурмя-гьямед Гьяжимягьямедовди хусуси метлеб айи операцияйиъ улупу гьунарикан ктибтну.
Спортдин центр ачмиш апIбан асас пай аьхирихъна гъюбан кьяляхъ, Сергей Меликов центрихъди ва душваъ спортсменариз спортдиин машгъул хьуз яратмиш дапIнайи шартIарихъди таниш гъахьну.
Му центр асас вуди спортдин кчIихбан жюрйириин машгъул хьуз кIури дапIнайиб ву, ва ду-шваъ 1000 квадратдин метр жилиин юкьяр дисбан спортдиин машгъул вуйидариз юкьяр дисбан спортдин 6 ковер ккирчна. Гьацира центриз волейбол, баскетбол ва мини-футбол апIру майднарра дахил шула.
«Анжи Арена» стадиондин генеральный директор Мягьямед Багьаудиновди гъапиганси, му залиъ сабишв’инди 80-90 касдиз спортдиин мушгъул хьуз мумкинвал а. Дугъан гафариинди, улихьнаси юкьяр дисбан спортдиан кIули гъубшу Урусатдин чемпионатдихьна Дагъустандин спорт-сменарикан уч дапIнайи команда кьюб гьяфтайин арайиъ гьаму центриъ гьязур гъабхьну.
Спортдин центр ачмиш апIбан серенжемдиз дуфнайи Сергей Меликовди москвайин «Динамо» академияйин филиалин бицIи футболистарихъдира гаф-чIал гъапIну ва дурарин хъуркьувалариканра гьерхну. БицIи футболистар жюрбежюр турнирарин гъалибчйир, хъа академияйин филиалин 3 футболист Урусатдин премьер-лигайин иштиракчйир вуйиваликан гъеебхьган, респуб-ликайин Главайи дурариз хъанара артухъ хъуркьувалар ккун гъапIну.
Пуб лазим вуки, «Анжи Арена» стадион 6 йистIан артухъ яшар вуйи, пишекарвалиинди футболиин машгъул духьнайи саки 300-дихьна бицIидар айи филиализ база дубхьна.