РФ-дин регионарикан, Краснодарский крайдилан алдабхъган, варитIан гизаф тIумтIин багълар айи йишв Дагъустан ву. Дагъустандиъ тIумутI битмиш апIбан ва чяхрар гьясил апIбан тарихра аьсрарин кьабар ккайиб ву. Мяишатдин му цирклиз гьюкуматдин терефнаанра аьхю фикир тувра. Гьадму гьисабнаан Роскачествойин экспертари йисан-йисан му цирклиъ гъябгъюрайи ляхнин ери ахтармиш апIура. Магьа ццира, гьацдар ахтармишар ккергъбахъди аьлакьалу вуди, 24-пи июндиъ Дербент шагьриъ «Урусатдин чяхрарин гид — 2022» ччвур тувнайи пресс-конференция кIули гъубшну.

 

Думу конференцияйиъ Дагъустандиъ айи тIумтIин багъларин гьял фициб вуш ва цIийи багълар итбан ляхин фици кIули гъябгъюраш ахтармиш апIбан, чяхрар гьясил апIбан ва мяишатдин му циркил туризмдихъди аьлакьалу апIбан, му ляхнариз банкари пулин кюмек тувбан ва гьацдар жара месэлйириз гъилигнийи.

Конференцияйиъ чяхрар гьясил апIбан ва ише гъягъюз гъитбан ляхнин департаментдин кIулиъ айи Олеся Буняева, РД-йин промышленностдин ва алверчивалин министр Низам Халилов, рес-публикайин тIумутI гьясил апIбан ва убхърубдин гъайгъу зигбан комитетдин председатель Шериф Керимханов, Дербентдин коньякар гьясил апIру комбинатдин генеральный директор Загьирбег ТIайибов, Дербент шагьрин администрацияйин вакилар ва гъирагъдилан дуфнайи касар иштирак гъахьнийи.

Серенжемдиъ удучIвну гъулхдарин гафариинди, Дагъустандин чяхрар йислан-йисаз артухъ масу гъадагъура ва дидихъди сабси тIумутI битмиш апIбан ляхинра улихь гъябгъюра. 2021-пи йисан рес-публикайиъ тIумутI битмиш апIру мяишатари 900 га цIийи багълар итну. Дагъустандиъ сифте вуди варитIан ише гъягъру жюрейин тIумтIарин уьру сортарин гъелемар кивбиин ляхин гъябгъюра. 2018-пи йислан ккебгъну, гьюкуматдин гъайгъударвалиинди инвестицйирин швнуб-саб гьацдар аьхю проектар ляхник кирчна. Гьацира багарихьди Дербентдиъ тIумтIарин фестиваль гъабхбанди ва думу фестивалиъ чяхрар арайиз адагъбанди ву.