Гьаму йигъари Табасаран райондин Кьалухъ Мирзайин ччвурнахъ хъайи спорткомплексдиъ, Хюрккарин шейх Сиражудин Эфендийин гьюрматназ бахш вуди, волейболиан турнир кIули гъубшну.

 

Талитариъ Дербент, Избербаш шагьрарин, Хив, Дахадаев ва Леваши районарин волейболин командйир иштирак гъахьну.
Регламентдиъ улупнайиганси, 6 команда 2 группайиз пай гъапIнийи. Полуфиналин сабпи талитариъ Табасаран райондин команда Левашийин волейболистариин 2:0 гьисаб ади гъалиб гъабхьну. Полуфиналин кьюбпи талитар Дахадаев райондинна Дербент шагьрин волейболин командйирин арайиъ лап маракьлуди, гъизгъинди кIули гъушну. Аьхирки, 2:1 гьисаб ади Дербентдин команда финализ удубчIвну. Хъа Дахадаев райондин командайин спортсменари, Леваши райондин командайиин гъалиб духьну, шубубпи йишв гъибисну.

Финалин талитариъ Табасаран райондин волейболин командайиз Дербент шагьрин волейболистарихъди спортдин бягьснаъ лап гъагъиди алабхънийи. Дербентдин командайиз фу чара дапIнура гъалиб хьуз ккундийи. Талитар 3 сетдиъ давам гъахьнийи. Амма табасаран райондин командайи чан кьастнан ижмивал улупну. Натижайиъ 2:1 гьисаб ади Табасаран райондин команда гъалиб гъабхьну.