Вари Урусатди сабхилди Украинайиъ кIули гъабхурайи хусуси метлеб айи операцияйиъ ватанди чан гъюнариин иливнайи буржи аьхю баркаллувалиинди тамам апIурайи генерал-майор Эседуллагь Абачевдиз 4-пи июлиъ Владимир Путиндин къарарнииди Урусатдин Игит кIуру ччвур тувну.
Игитрин дада балин нубатнан хъуркьувалихъди вари Хив райондин агьалйирин терефнаан тебрик апIбан гафар хьади, багахьлуйирихъди сабси му шадвал пай апIури, райондин глава Ярмет Ярметов, главайин заместитель Мирзабег Багъичев, МО-йин ляхнарин идара апIру Арсен Рамазанов, гъуларин главйир Агъаверди Жалилов, Имамудин Мягьмудов ва мирас Зейдуллагь Гьяжиризаев аьхю аьшкьниинди ва иштагьниинди дугъахьна хялижвди гъафнийи.
Салам тувну, хуш-беш апIбалан кьяляхъ, делегацияйин вакилари, Игитрин дада кьялаъ тIаъну, устлихъ мани чай убхъури, бали ватандин вазифйир уьрхбаъ улупурайи жюрэтлуваликан, игитваликан сюгьбат гъабхуз хъюгънийи.
«Гъи яв бай ихь райондин фурс ва дамагъ духьна. Гьацир Игит бай гъапIу, дугъаз гъудубкьу, намуслу тербия туву увуз аьхю чухсагъул ва икрам, дада! Балин йигълан-йигъаз артухъ шулайи хъуркьувалари юкIв шад апIури, жан сагъди гьамциб тербия хутлар, гудларихьна рубкьуз, дюн’яйиъ ислягьвал ади, кIул’ин алтIабгнайи укIу, марцци зав алди дуланмиш хьуз гизаф йисар тувривуз!» — гъапнийи Ярмет Аьлиметовичди.
Игитрин байвахтнан ва урхурайгандин йисарикан ктибтури, альбомдиан вуйи шиклар улупури, сюгьбат давам апIурайи дадайи бализ телефондиан зенгра гъапIнийи. «Хялижвди дуфнайи делегацияйин вакилари увуз мани саламар хътаури а, ва, уву фила гъюру кIури, гьерхра, жан бай? Фу пуза?» — гъапнийи дадайи. Хал абцIну, гъалин сесниинди: «Багарихьди дада, гъалибвал улихь ва кIваъ ади, багарихьди. Яв тербия ву гьа, дада!» — Игитрихьан жаваб гъабхьнийи.
Игитрин жаваб гъеебхьиган: «Игитарди бабкан шлуб дар. Дурар уьмри арайиз хуру», — цIар ккадатури къайд гъапIнийи Ярмет Ярметовди.
Аьхириъ Игитрин дадайи, хялижвди дуфнайи делегацияйин вакиларин чаз тувнайи фикриз, хатур-гьюрматназ чухсагъул мялум дапIну, гьарган дюн`яйиъ ислягьвал, хизанарин арайиъ гьякь-гьюрмат ва хушбахтвал хьувал ккун гъапIнийи.
