Украинайиъ гъябгъюрайи хусуси метлеб айи дявдин операцияйиъ, Ватандин улихь гъуллугънан буржи тамам апIури, чпин жандилан хил алдабгъну, урусатдин эскрари аьхю игитвал улупура. Дурарихъди сабси ихь миллетдин вакиларира заан кьягьялвал улупурайивал кми-кмиди гъюрайи пашманвалин хабрари ачухъ апIура. Магьа сарсана табасаран бали дирбаш’вал улупбаз, гьяйифки, чаз ваъ, хъа аьхю хажалатниинди дугъан багагьлуйириз чухсагъулин гафар пуб алабхъну.
Табасаран райондин глава Мягьямед Къурбановди Украинайиъ гъябгъюрайи хусуси метлеб айи дявдин операцияйиъ чан гъуллугънан буржи тамам апIурайи вахтна кечмиш гъахьи ЦIурутIил гъулан агьали Мурад Гьяжимурадовдин Кьягьялвалин орден дугъан багагьлуйирихьна тувну. Гьаддин гьякьнаан муниципалитетдин пресс-гъуллугъну мялум гъапIну.
Багагьлуйирихъди вуйи му пашманвалин гюрюшдиъ Табасаран райондин дявдин комиссар Садикь Мурадялиевра иштирак гъахьну.
Аьхюну прапорщик Мурад Гьяжимурадовди Краснодарский крайдин Горячий Ключ кIуру шагьриъ дявдин частнан хусуси метлеб айи 10-пи бригадайиъ гъуллугъ гъабхури гъахьну. Думу 21-пи майдиъ Харьковский областдиъ женгар гъягъюрайи вахтна кечмиш гъахьну. Дявдин гъуллугъчийин хпир ва шубур бицIир хизандин кIулихъ ва адашдихъ мягьрум гъахьну.
Багахьлуйирихъди вуйи улхбаъ Мягьямед Къурбановди ва вари уч духьнайидари дурариз башсагълугъ’вал ккун гъапIну ва рюгьнан гъадмивалихьна ва сабурлувалихьна дих гъапIну. Гюрюшдиъ къайд гъапIганси, Украинайиъ чпин жанар диву дявдин гъуллугъчйирин гьюрмат уьбхюри ва дурарин ччвурар уьмурлугъ кIваинди гъузбан бадали, чпин багъри гъулариъ кючйириз дурарин ччвурар тувди.
Райондин дявдин комиссар Садикь Мурадялиевди Урусатдин Президентдин Указдихьна вуйи мялуматарин кагъаз гъурхну – «Гъуллугънан буржи тамам апIурайи вахтна улупу кьягьялвализ, игитвализ ва дирбаш’вализ лигну, аьхюну прапорщик Гьяжимурадов Мурад Гьяжимурадовичдиз Кьягьялвалин орден тувуб (кечмиш гъахьиган)». Хъасин райондин главайи дугъан багагьлуйихьна орден тувну.
«Украинайиъ гъябгъюрайи хусуси метлеб айи дявдин операцияйиъ гизаф ихь баяри иштирак’вал апIура ва кьягьялвалиинди чпин гъуллугънан буржи тамам апIура. Гъийиху игитарин ччвурар гьаммишандиз халкьдин кIваъ гъузди. Ич терефнаан дурарин хизанариз вари жюрейин кюмек тувуз гьязур вуча», – аьлава гъапIну Мягьямед Къурбановди
