Хив райондизди учIвруган алабхъру тагънахъ ихь Урусатдин Игит бай Эседуллагь Абачевдиз бахш дапIнайи стенд дивну. Думу чан хусуси аьшкьниинди ва иштагьниинди гьязур гъапIур ва дивур Хив райондин администрацияйин культурайин, спортдин, жигьиларин политикайин ва туризмдин отделин начальник Казбек Къазиев ву.

 

Стенд гьязур апIбан асас метлеб фу вуш, Казбек Зейнудиновичди гьамци субут апIура: «Ав, гъилигиган фукIа дар ва фикир гъапIиган анжагъ саб шикил ву. Хъа гьаму саб шикли аргъаж шулайи наслар тербияламиш апIбаъ аьхю роль уйнамиш апIуру. Фицики дурариз гьамцдар шиклариан вуйи суратар кади гьязур дапIнайи стендар, мармардашдин гъванар кючейин хуларик керхну, райондизди, гъулазди учIвруган гьязур дапIнайи пIипIариъ ядиграр дивну гъяркъиган, гьерхуб-хъерхуб гъапIиган, гьаз флану касдин ччвурнахъ кюче, мектеб, ядигар хъаш, дурар гъавриъ шула.

Мектебариъ сабпи зенг йивру вахт хьайиз, Украинайиъ гъабхурайи хусуси метлеб айи операцияйиъ, Ватандиз гъуллугъ апIбаъ вафалувал улупури, чпин жанар диву баяриз стендар гьязур апIуз хьибди кIури, аьхю миж кивраза, ва узхьан шлу кюмек тувуз гьязурди аза. Гъит аргъаж шулайи наслариз дурар фици, фуж бадали ва фу бадали уьмриан гъушдар вуш, хабар ибшри ва уьмриъ нумуна ишри!»