Хив райондиъ сабхилди вари мектебариъ урхбан цIийи йисахьна вуйи расвалин ляхнар кIули гъягъюра.
Урусатдин «Мектебарин образованиейин гъурулушарин модернизация» программайин дахилнаъди Гъвандккарин ва ЦIийи Фрюгъярин мектебариъ рас апIбан ляхнар кIули гъягъюра. Вари уьлкейиъ гьяракатнаъ ипнайиъ «Точка роста» программайиинди тялукь центрар гьязур апIбан ляхнар Сюгют ва Ургъа гъуларин мектебариъ гъахура. (КIваин апIуз ккундузуз, гъийин йигъаз райондиъ мицдар центрар 9 мектебдиъ а). Гьацира райондин имбу гьарсаб мектебдиъ классарин ва коридорарин цалариз, полиз ширар, айтIанди ва чIатанди цалариз гьякар йивбан гъизгъин ляхнар яцIаъ а.
Саб улхуб-рахубра адарди рас апIбан му ляхнариъ иштирак шули, дурар гъизгъин апIуз вари чарйир агурайи мектебарин администрацйириз, мялимарин ва техперсоналин коллективдиз Хив райондин образованиейин отделин кIулиъ айи Назаряли Тарлановди чухсагъул мялум гъапIну.
«Гьаз учу цIийи урхбан йисан кIулиъ ширар ва гьякар йивбаъ иштирак шулу? Му ич вазифа вуйинхъа? Му ляхнар апIбан учуз фу кахъа?» – кIури, гъалмагъал ипру касар саб бязи йишвариъси дарди, ихь райондин мектебариъ гьич саб коллективдиъра адар. Гьарсаб мектебдиъ чан ликрихъ кабинет хъайи мялимди йисан эвелиъ гъахурайи му ляхнариъ иштирак хьувал жвуван вазифаси гьисаб апIура, гьаз гъапиш гьар вазли кабинет ликрихъ хъайивалиан, классдин руководство хьайивалиан маважиб рубкьуразухьна кIура. Гьаддиз дурар, рас апIбан ляхнариъ хилар хъиржвну иштирак шула. Мурар чпиз нумунади гъадагъури, мектебдин техперсоналира чпихьан шлуб ва удукьруб апIури, коллективдин ляхин улихь гьипра. Гьелбетда, райондин гьарсаб мектебдин коллективдин му сабвал ва лазим вуйи вахтна гьамци бакар хьувал сифтена-сифте райондин администрацияйин, хъасин образованиейин отделин кIулиъ айи йиз, гьарсаб мектебдин администрацияйин, гьацира гьарсаб коллективдин аьхю бахт ва дамагъ ву. Сабсан ражну гьарсаб коллективдиз чухсагъул кIураза. Гъит ухьуз ужудар хъуркьуваларин натижйир айи хайирлу йис ибшри, гьюрматлу гъарашугъар!» — къайд гъапIнийи Назаряли Тарлановди.
