Республикайин рякъяриин шулайи аварйирин кьадар, гъелелиг, ис абхърадар. Гьар йигъан му бедбахтвалин дюшюшариъ йихурайидарикан ва зийнар шулайидарикан республикайин МВД-йиан хабрар тувра, махлукьатлу дакьатариъ бикIура, амма аьгьвалат читинубди гъубзра.
Дагъустан республикайин МВД-йин УГИБДД-йин пропаганда гъабхру отделин кIулиъ айи полицияйин майор, ихь ватанагьли Руслан Рягьимовди туву мялуматариинди, цци ккудубшу гьацI йисандин арайиъ Дагъустандин рякъяриин 655 ДТП гъахьну. Думу дюшюшариъ 109 кас гъийихну ва 910 касдиз зийнар гъахьну. Гъийихдарикан 12 кас ва зийнар гъахьидарикан 102 кас 16 йис’ина яшар дархьи бицIидар ву.
Ккудубшу йисанра тялукь вахтнан арайиъ (январин эвелиан июндин аьхиризкьан) республикайин рякъяриъ 665 аварйир гъахьнийи ва дурариъ 129 кас гъийихнийи, 926 касдиз зийнар гъахьнийи, гьадму гьисабнаан 16 йис’ина яшар дархьи 4 бицIир кечмиш ва 90 бицIириз зийнар гъахьнийи.
Гьаму хатIалу дюшюшар арайиз гъюбан себеб – инсанарин гьялакивал, машин хъапIрайидари сари сариз рякъ тутрувувал, рякъюн къаршу зулизди удучIвувал ву. Рякъяриъ машин хъапIну гъягъбан культура дюрюбхрувалин натижайиъ бедбахтвал арайиз гъюра, кIура Руслан Рягьимовди.
Июлин вазлиъра республикайиъ хайлин аварйир гъахьну. Анжагъ ккудубшу гьяфтайин арайиъ Дагъустандиъ 27 ДТП гьисабназ гъадагъна. Натижайиъ 8 кас гъийихну ва 41 касдиз гъагъи зийнар гъахьну. Зийнар гъахьидарин арайиъ 7 яшар бегьем дархьидар а.
Арайиз дуфнайи къурхулу гьял гьисабназ гъадабгъну, Руслан Рягьимовди дагъустанлуйирикан рякъяриъ ихтиятди машин хъапIувал, сар сарихьна гьюрмат ади гъузувал, рякъюн къайдйир уьрхювал ккун апIура.
