Ухьуз мялум вуйиганси, 1966-пи йисланмина 20-пи июль Варидюн’яйинин шахматарин йигъси къайд апIура. Му йигъан гъаншариъ ва улубкьурайи Дагъустан Республикайин Конституцияйин йигъазра бахш вуди Хив райондиъ шахматарин турнир кIули гъубшну.

 

Турнирин 20-рилан зина касар иштирак гъахьнийи, гьадму гьисабнаан гъунши Табасаран райондианра. Тамаша апIрударин кьадарра цIиб дайи.

Талитар ачмиш апIури, райондин ЦБС-дин директор ва райондин дишагьлийирин союздин председатель Зумрият Саидягьмедовайи ва культурайин, спортдин, жигьиларин политикайин ва туризмдин отделин пишекар Расим Акимовди иштиракчириз хъуркьувалар ва ужудар сяътар хьуб ккун гъапIнийи.

Турнирин иштиракчйир кьюб – яшлуйирин ва набалугъарин – дестейиз пай гъапIнийи. Яшлуйирин арайиъ 1-пи йишв Муса Мусаевди (Заан Яракк), 2-пи йишв дугъан гъулажви Имран Исаевди ва 3-пи йишв Аьшурбег Аьлимягья-медовди (Мажвгул) гъазанмиш гъапIнийи.

Заан натижйир набалугъарин дестейин иштиракчйирира улупнийи. Дурарин арайиъ лайикьлуди 1-пи йишв, чан жигьил яшариз дилигди жюрбежюр дережйирин талитариъ чемпион духьнайи Мягьямед Мукаиловди (НичIрас) гъадабгънийи. Кьюбпи ва шубубпи йишварин сагьибар Нажмудин Жяфаров (Хив) ва Рамазан Мукаилов (НичIрас) гъахьнийи.

Турнирин натижйир йивури, тешкилатчйири 1-3пи йишвар гъадагъу касар гьюрматнан кагъзариинди, пешкешариинди ва пулин премйириинди лишанлу гъапIнийи.