Гъубшу гьяфтайиъ Дагъустандиъ гьюлик ва нирарик жикIурайи вахтна штукк ккахъну, 14 кас гъийихну.

 

Республикайин МВД-йин пресс-гъуллугъну туву мялуматариинди, му бедбахтвалин дюшюшар Мягьячгъала, Дербент шагьрариъ, Къарабудагъкент, УнцукIул, Къизилюрт районариъ гъахьну. Гъийихдарин арайиъ яшар бегьем духьну адру бицIидарра а.

Мисалназ, Къизилюрт райондиъ Сулак нирик жикIурайи вахтна Мягьячгъала шагьриан вуйи кьюр жигьил бай штукк ккахъну. Дербентдиъ гьюлик жикIурайи 16-18 йисариъ айи шубур жигьил баяр-дустар гъийихну. Дурар шубредра гьюликк ккахърайи кьюр шураз кюмек апIуз штукк кучIвдар вуйи. Дурарихьан сар риш штукан кадагъуз гъабхьну. Амма кьюрпи ришра, чпира ккахъну.

Ирганайин шид уьбхюрайи йишв’инра хатIасуз дюшюш гъабхьну. Дина рягьятвал гъадабгъуз дуфнайи сар турист, жикIуз кIури, штуъ урсну, амма дугъхьан гъирагъдикна кудучIвуз гъабхьундар. Туристдин майит водолазари ккадабгъну.

Аьхиримжи вахтари нирарихъ ва гьюлихъ хатIалу дюшюшарин кьадар артухъ шулайивализ лигну, региондин МВД-йи республикайин агьалйирикан ва хяларикан хатIасузвалин къайдйир уьрхюб ккун апIура.

КIваинди гъитай: жикIуз къадагъа апIурайи лишнар ва мялуматарин плакатар кайи йишварихь жикIуз ва рягьятвал гъадабгъуз, тахтйириин, автомобилин чархарин камерйириин дахъну, сирнав йивуз, ички дубхъну, штук кучIвуз, ягъли йишварилан штуъ урсуз ихтияр адар! Гьацира штун гъвалахъ бицIидар гьаммишан уликк уьрхяй. Саб герендиз гюзчивал зяиф апIували хатIайихьна хуб мумкин ву.