Цци Табасаран райондин рякъярин мяишатдиъ гъахурайи ляхнарин цIарнаъ Ягъдигъ гъулазди вуйи 3 километрин рякъюъ асфальт улубзуз планариъ айиваликан мялуматар тувнайча. Магьа гьаму йигъари пландиъ улупнайи ляхин тамам апIуз хъюгъна.

 

 

Къайд апIуб лазим вуки, му «Дагавтодор» ГКУ-йин тIалабниинди рас апIурайи ва Дербент-Хучни рес-публикайин мяна айи рякъкан жара шулайи рякъ ву. Асфальт улубзбахьна гъяйиз, мушваъ хайлин читин ляхнар кIулиъ духна. Гъул читин йишвахь ерлешмиш дубхьнайи, гьаддиз дина гъябгъюрайи рякъ яркьу апIбан ва асфальт улубзуз диш апIбан бадали вуйи ляхнар аьдати техникайихъди кIули гъахуз даршлувализ лигну, душваъ гъарзар даргъру техника ишлетмиш гъапIну. Гьаму ляхнар гьеле апрелин вазлиъ «НЭМА» ООО тешкилатди ккергънайидар ву кIури, Табасаран райондин администрацияйин пресс-гъуллугънаан хабар тувра. Гьамусяаьт му тешкилатди аьхиримжи 10 йигъандин аарайиъ 2 километр рякъ’ин асфальт улубзну ккудубкIна.

Ляхнар фици гъягъюраш ахтармиш апIуз, мина улихьна йигъари райондин глава Мягьямед Къурбанов, райондин депутатарин Собраниейин председатель Иса Исаев, Хючна гъулан поселениейин глава Аьбдуселим Гираев гъушну.

Му рякъ рас апIбаъди давам шулайи ляхнар ужуб ерийиинди тамам апIурайивализ, райондин главайи ужуб кьимат тувну ва августдин аьхириз вари ляхнар аьхирихъна дуфну, рякъяриин шлу лишнарра ва рякъюн кьял’ан цIар зигбаканра мялум гъапIну.

«Райондин рякъяр рас дапIну, ужуб ерийиккна хувал – ич улихь дивнайи асас вазифйирикан саб вуйич. Гьар йисан райондин асас рякъярси, гъуларризди вуйи рякъярра рас апlура. гъийин йигъаз муниципалитетдин швнуб-саб гъулаз асфальт али рякъяр дапIна. Гьаму ляхниъ гъулан агьалйирира иштираквал гъапIнийиш ужу шуйи, фицики дурарра кюмекчйир гъахьиган, фуну ляхин вушра улихь гъябгъюру», – аьлава гъапIну Мягьямед Къурбановди.