Дагъустандиъ цIийи кIул’ан коронавирус тарабгъувалин улихьишв бисбан уьлчмйир кьабул апIура. Республикайиъ думу уьзрихъди ктIерццурайидарин кьадар хъана артухъ хьуз хъюбгъна. Гьаддиз лигну больницйириъ тялукь койкйирра артухъ шула. Аьзарлу гъахьидар Республикайин инфекционный центриъси, Каспийский стационариъра, Ботлих ва Лак районарин кьялан больницйириъра ккаъна. Гьаддин гьякьнаан РД-йин минздравдин пресс-гъуллугъну мялум гъапIну.

 

Республикайин минздравди, коронавирусдин тIягъюн тарабгъувалин улихьишв бисури, больницйириъ тялукь къайдайин ижми уьлчмйир кьабул апIура, гьадму гьисабнаан маскйир алахьувалин, температура ебцувалин, арайиъ манзил ади гъитувалин, дезинфекция апIру дакьатар ишлетмиш апIувалин ва 65 йислан зиина яш дубхьнайи агьалйирин сагъламвал гюзчиваликк уьбхювалин.

Аьхиримжи суткайиъ, 11-пи августдиъ, коронавирусдин уьзур кубчIвувал тасдикь гъабхьидарин кьадар 105 кас ву, больницйириъ ккаънайидар – 11 кас. Дагъустандин минздравдин ва Роспотребнадзорин лабораторйири суткайиъ 4000-рихьна ахтармишар гъахура.

РФ-йин минздравдин кIулиъ айи Михаил Мурашкойин регьберваликкди кIули гъубшу селекторный совещаниейиъ къайд гъапIганси, агьалйирин ревакцинация гъабхувал чарасуз лазим ву. Жвув инфекцияйихьан ва дидин натижйирихьан уьрхбан бадали ревакцинация апIувал варитIан мянфяаьтлу вуйиб тасдикь дубхьна. Сагъламвалин гьялназ лигну, «Спутник V» руб йивуз ихтияр адрударихьан «Эвушелд» кIуру дарман ишлетмиш апIуз шулу. Чан кьимат 50 агъзур манат вуйи му дарман республикайин шагьрарин ва районарин поликлиникйириъ пулсузди гъадабгъуз шулу.

Жямяаьтлугъ сагъламвалин ва медицинайин профилактика гъабхбан республикайин центри дагъустанлуйириз, иллагьки 65 йислан зиина яш дубхьнайи ва сагъ даршлу уьзрар кайи ватанагьлийириз, ихтиятвал апIбакан, сабишв’инди гизаф инсанар уч духьнайи йишварихьан ярхла хьуваликан, кми-кмиди хилар жикIбакан ва COVID-19 уьзриз аькси ревакцинация гъабхуваликан гьадрархуб тIалаб апIура.