Гъябгъюрайи йисан 20-пи ва 21-пи августдин йигъари Хив райондин Ккугъ гъулаъ мини-футболиан талитар кIули гъушну. Дурар полицияйин майор Ариф Назирович Аьгьмедовдин гьюрмат уьбхбаз, дугъан сурат кайи мармардашдин гъван ва Ккугъ гъулаъ дугъан ччвурнахъ мини-футболин майдан ачмиш апIбаз бахш дапIнайи.
КIваин апIуз ккундузуз, Ватан уьбхру жавабдар гъуллугънаъ айи Ариф Назирович Аьгьмедов 2011-пи йисан 5-пи майдиъ Сергокъала райондиз нубатан ражари командировкайиз гъушур, гъачгъари рякъ’ин ккивнайи тIуркIру сяняаьтдиинди дишлади раст духьну, йишв’ин кечмиш гъахьнийи. Намуслу гъуллугъ апIбаз лигну туву хайлин грамотйирин, дипломарин ва медаларин сагьиб вуйи жигьил майор 3-пи мартди 2021-пи йисан РФ-дин Президентдин къарарниинди «Жямяаьтлугъ къайда уьбхбаъ тафавутлу хьувализ лигну» медалииндира йикIбалан кьяляхъ лишанлу гъапIнийи. КIваин апIуз ккундузуз, Ватан уьбхру жавабдар гъуллугънаъ айи Ариф Назирович Аьгьмедов 2011-пи йисан 5-пи майдиъ Сергокъала райондиз нубатан ражари командировкайиз гъушур, гъачгъари рякъ’ин ккивнайи тIуркIру сяняаьтдиинди дишлади раст духьну, йишв’ин кечмиш гъахьнийи. Намуслу гъуллугъ апIбаз лигну туву хайлин грамотйирин, дипломарин ва медаларин сагьиб вуйи жигьил майор 3-пи мартди 2021-пи йисан РФ-дин Президентдин къарарниинди «Жямяаьтлугъ къайда уьбхбаъ тафавутлу хьувализ лигну» медалииндира йикIбалан кьяляхъ лишанлу гъапIнийи.
Талитариъ иштирак шулайи 15 команда кьюб дестейиз жара гъапIнийи. Сабпи дестейиъ Хив райондин Асккан Яракк, ЦIанитI, ЦIудухъ, Хив, Хирижв, Лика, Чювекк, Ккугъ ва Гъвандикк гъулариан вуйи командйири, хъа кьюбпи дестейиъ – варитIан кIубан команда тяйин апIбан метлебниинди Кьибла Дагъустандин 6 райондиан – Мягьярамкент, СтIал Сулейман, Къурагь, Табасаран, Дербент ва Хив районариан – дуфнайи командйири футбол уйнамиш гъапIнийи.
Талитар ачмиш апIури, Хив райондин кIулиъ айи Ярмет Ярметовди ккугъарин жямяаьт ва майорин тухум-тара А.Н. Аьгьмедовдин ччвурнахъ хъайи мини-футболин таза майдан тIапIрайивалихъди райондин администрацияйин ва депутатарин собрание-йин терефнаан тебрик гъапIнийи.Хъасин талитар ккергънийи. Натижайиъ Хив райондин гъулариан вуйи командйирикан 1-пи йишв Асккан Яракк гъулан футболистари, 2-пи йишв ЦIанитI гъулан ва 3-пи йишв ЦIудухъ гъулан командйири гъазанмиш гъапIнийи.
Хъа районарин командйирин арайиъ гъахьи талитарин гъалибчи Мягьярамкент райондин команда гъабхьнийи. 2-пи йишв – Дербент райондин «Рубас» командайиз ва 3-пи йишв Къурагь райондиз кьисмат гъабхьну.
Пешкешнан йишвар гъадагъу командйир тялукь грамотйириинди, кубокариинди ва пулиинди лишанлу гъапIнийи. Дидланра савайи, гъалибвалихьна вуйи гьевесназ лигну, Хив райондин, Табасаран райондин «Ягъдигъ» ва СтIал Сулейман райондин «Кюре» командйир, хъа гьацира Асккан Ярккан варитIан жигьил гьевескар Заким Аьбдуллаев ва варитIан актив гьевескар Аьшурбег Исабегов чухсагъул мялум апIру кагъзариинди лишанлу гъапIнийи.
