Гъулан йишвариъ хал тикмиш апIуз вая масу гъадабгъуз туврайи льготайин ипотекайин кредитарин программа вахтсузуб гъапIну. Дидин гьякьнаан вуйи къарарниин РФ-дин Правительствойин председатель Михаил Мишустинди къул гъизигну.
«Гъулан агьалйирихьан гьамус, программайин вахт ккудубкIбакан гучI ктарди, чпин хал тикмиш апIуз вая масу гъадабгъуз кредитар адагъуз шулу», – къайд гъапIну дугъу.
Сифте вуди программа 2022-пи йисан 31-пи декабриз давам дапIнайиб вуйи. Дидин вахт ярхи апIували хъана артухъ гъулан агьалйирихьан 3% льготайин ставка алди ипотекайин кредитар адагъуз хьибди.
КIваин апIурача, «Гъулан ипотека» программа 2020-пи йисхъанмина гьяракатнаъ а. Гьаддихъанмина уьлкейиъ 187,1 млрд манатдин кьадарнаъди 97 агъзур кредитар тувна. Программайин кюмекниинди 5,2 миллион квадратдин метр хал-йишв тикмиш апIуз ва масу гъадабгъуз гъабхьну. Дидин асас метлебра – Урусатдин ватандашариз, заълан тувру пул 3%-тIан артухъ дарди, ипотека адабгъуз мумкинвал дубхьну, гъулан йишвар чIиви алауб, душвариъ дуланмиш шулайидарин кьадар артухъ ва уьмрин ери за апIуб ву.
Гъулан ипотека гъадабгъбан асас шартIарикан аьгъяди ккунду.
Думу уьмриъ саб ражаритIан гъадабгъуз шулдар. Урусатдиъ думу уьмриз кечирмиш апIурайиб Минсельхоз ву. Гьар йисан гьюкуматди дидиз программа кIули гъабхуз пул жара апIура. 2022-пи йисан му программайиз 11,5 млрд манат улупна. Программайин шартIариинди, хал-йишв гъадабгъру йишв 30 агъзурихьна агьалйир яшамиш шулайи, хусуси сиягьнаъ тIаънайи гъулан агломерацйир вуди ккунду. Думу сиягь РФ-дин субъектдин тамам апIру гьюкмин заан органди тасдикь апIуру. Эгер тикмиш апIурайи вая масу гъадабгъурайи хал-йишв али жилар думу сиягьнак ктарди гъабхьиш, му метлебназ гъулан ипотека адабгъуз шулдар.
Гьацира, гъулан ипотекайин шартIариз асас вуди, Москвайиъ, Московский областдиъ ва Санкт-Петербургдиъ хал-йишв гъадабгъуз ихтияр адар. Гъадабгъурайи хал-йишв, аквар ва шид, канализация ва отопление дизигну, яшамиш хьуз шлу варибдихъди тямин дапIнади ккунду.
Эгер ипотекайин пул жара метлебариз ишлетмиш апIури гъабхьиш, кредит тувру вахт 90-йигътIан артухъ кьаназ илдипиш ва хал-йишв дивру вахт ярхи гъабхьиш (24 вазлин арайиъ хал дивну ккунду), процентарин ставкайин кьадар за апIубра мумкин ву.
КIваин апIурача, Дагъустандиъ гъулариъ яшамиш шулайи агьалйирин кьадар 50%-тIан зина ву.
