Пишекарвалин образование артмиш апIбан Институтди ва «Гележегдиз билет» проектдин оператор вуйи гуманитарный проектарин Фондди сатIиди ляхин апIбан гьякьнаан йикьрар гъийитIну. Гьаддин гьякьнаан РФ-дин образованиейинна илимдин министерствойин пресс-гъуллугъну мялум гъапIну.
Гьаци, инвалид бицIидариз ва сагъламвалин зяйифвал кайидариз чпин гъюзимбу пише ктабгъбан месэлйириан, гьадму гьисабнаан кьялан пишекарвалин гъурулушдиъра, кюмек апIиди.
«Учу урусатдин мектебариъ урхурайи вари баяр-шубари му проектдиъ иштирак’вал апIбан зиин ляхин гъабхурача. Пишекарвалин образование артмиш апIбан Институтдихъди сатIиди вуйи ич ляхнин натижа пишекарвалин цирклиан улихь гъягъюз кюмек тувру майдан дубхьну ккунду. Дидин кюмекниинди зиихъ къайд дапIнайи гъатарик кахьрайи баяр-шубарихьан чпин региондиъ зегьметнан рынокдин игьтияжарин гьякьнаан мялуматар гъадагъуз хьибди. Гьацира кьялан пишекарвалин образованиейин ери за апIбанди ва экономикайин игьтияжариз асас вуди кадрйир гьязур апIру сатIланди вуйи програмйир артмиш апIбанди вуча», – гъапну гуманитарный проектарин Фонддин директор, «Гележегдиз билет» проектдин федеральный оператор Иван Есинди.
КIваин апIурача, 6-11-пи классариъ урхурайи баяр-шубар гъюзимбу уьмрин пишейихьна улихь ккимиди гьязур апIбан «Гележегдиз билет» проект РФ-дин Президент Владимир Путиндин тIалабниинди уьмриз кечирмиш апIурайиб ву.
РД-йин образованиейин гъуллугъчйирин августдин совещаниейиъ Дагъустандин образованиейин ва илимдин министр Ягь’я Бучаевди му проект ихь республикайиъ уьмрин гьяятдиз фици адабгъураш, ктибтнийи.
«2022-пи йисан сабпи гьацIаъ мектеб ккудубкIурайидариз пише ктабгъуз кюмек тувру серенжемариъ 29 агъзурилан зиина баяр-шубари иштирак’вал гъапIну. Гъубшу йисан декабрин вазлиъ урхурайидариз ва дурарин абйир-бабариз вуйи тялукь серенжемарин 2021-2025-пи йисариз вуйи региондин план тасдикь гъапIну. Дидиз асас вуди урхурайидар яваш-явашди гъюзимбу пишейихьна гьязур апIиди», – гъапну министри.
Я. Бучаевди аьлава гъапIганси, региондин пландин серенжемар уьмриз кечирмиш апIури, ихь школьникариз гъюзимбу пише дюзди ктабгъуз, гъадабгъу пишейихъди ляхниъ дийигъуз ва гележегдиъ хъуркьувалиинди ляхин апIуз мумкинвал хьибди.
