Сентябрин 1-пи йигъ ихь уьлкейиъ  тафавутлу йигъ ву, фицики думу йигъан швнуб-саб машквар – урхбан цIийи йис, сабпи классдиз гъягъюрайи бицIидариз вуйи сабпи зенг, мектеб ккудубкIу жигьилариз вузариъ, колледжариъ дарсар ккергъру йигъ – къайд апIуру. Думу аку йигъ уьлкейин дережайиъди Аьгъюваларин йигъси къайд апIурахьа.

 

Уьлкейин дережайиъди машквар къайд апIували ихь гьюкуматдиъ образованиейиз туврайи дикъат, вари терефариан аьгъювалар гъадагъувалин чарасузвал ва важиблувал улупура.

Гьюрматлу мялимар, абйир-бабар, мектебдиз гъягъюрайи бицIидар! Учвуз варидариз Аьгъюваларин йигъ мубарак ибшри. Гьаму урхбан йисан учвуз ляхниъра, урхбаъра заан хъуркьувалар ишричвуз.

Заан классариъ урхурайидариз ужудар аьгъювалар ади мектеб ккудубкIувал, сабпи классдиз гъягъюрайидариз аьгъювалар гъадагъбахьна артухъ маракьлувал ккун апIурача. БицIи веледдиз аьгъювалар тувбаъ абйир-бабари дибиснайи йишв мялимдин йишвтIан цIиб дар, ичв аьгъювалар, уьмрин тажруба ичв бицIидариз тувуз мумкинвал абгай.

Гьюрматлу мялимар, ичв жвуван пишейиз вуйи вафалувализ аьхю чухсагъул. Учвуз мюгькам сагъвал, зегьметнан пучIу рякъ ва заан хъуркьувалар ишричвуз.

Варидарин машквар мубарак ибшри, аьгъюваларин дюн’яйиз ягъурлу рякъ ибшри!

Редакцияйин коллектив.

 

УРХБАН ЙИС МУБАРАК

 

М.Шамхалов

Ичв кIвак паплар кивру илми
Илмихъан хъичIихай ижми.
Думу гьардиз ву гирами –
Учвуз урхбан йис мубарак!

 

Варди урхай, дургъай дарсар,
Урхбаъ кьяляхъ даришри сар.
Ккергъна ичв зегьметнан йисар,
Урхай, урхру йис мубарак!