1-пи сентябриъ Дагъустандиъ образованиейин 21 цIийи дарамат ва 200-дилан зиина капитально рас дапIнайи мектебар ачмиш гъапIну. РД-йин образованиейин ва илимдин министерствойин улупбариинди, гьаму йисан 1-пи сентябриъ республикайиъ 55413 бицIир сабпи классдиз гъушну.
Республикайин цIийи мектебар ачмиш апIурайи йишвариз Дагъустандин Главайилан гъадабгъну, Правительствойин, Халкьдин Собраниейин гизаф гъуллугъчйир гъушну.
Дагъустан Республикайин Глава Сергей Меликов Ахцигь райондин Луткун гъулаъ ачмиш апIурайи 400 бицIириз йишв айи мектеб ачмиш апIбан серенжемариъ иштирак гъахьну. Мектеб РФ-дин гьюкуматдин «Образованиейин артмиш’вал» программайин дахилнаъди тикмиш гъапIуб ву. Хьуб дараматдикан ибарат вуйи шубуб мертебейин мектеб деврин вари жюре техникайихъди тямин дапIна. Гьарсаб классдиъ интерактивный доскйир, акустикайин гъурулушар, проекторар, моноблокар, компьютерар а. Шубуб сменайиъди мектебдиз гъягъюрайи гъулан бицIидарин месэла цIийи мектеб тикмиш апIували гьял гъапIну.
РД-йин Правительствойин председатель Аьбдулмуслим Аьбдулмуслимов Хасавюрт райондин ЦIийи Костек гъулаъ 400 бицIириз йишв айи цIийи мектеб ачмиш апIбан серенжемариъ иштирак гъахьну.
Улихь йисари думу гъулан бицIидарра шубуб сменайиъди мектебдиз гъягъюрайи. «Образованиейин артмиш’вал» федеральный программайин дахилнаъди диву цIийи мектебди месэла гьял гъапIну.
1-пи сентябриъ Мягьячгъалайин шагьрин округдин Богатыревка гъулаъ 200 бицIириз йишв айи, Мягьячгъалайин Аьзиз Аьлиевдин ччвурнахъ хъайи кючейиъ 60 бицIириз йишв айи «Сказка Востока» бицIидарин багъар ачмиш гъапIну. Думу серенжемариъ Мягьчгъала шагьрин мэр Салман Дадаев иштирак гъахьну.
***
1-пи сентябриъ Табасаран райондин образованиейин 58 идарайиъ Аьгъюваларин йигъаз бахш дапIнайи серенжемар кIули гъушну. Райондиъ 8 агъзуртIан артухъ бицIидар мектебариз гъушну, дурарикан 790 бицIир – сабпи классдиз.
Аьгъюваларин йигъ Табасаран райондин СиртIич гъулан агьалйириз аьхю машквран йигъ гъабхьну. I-пи сентябриъ мушваъ 60 бицIир кьабул апIуз йишв айи бицIидарин «Ахсрар» ччвур тувнайи цIийи багъ ачмиш гъапIну.
БицIидарин багъ ачмиш апIбан серенжемдиъ Дагъустан Республикайин главайин РД-йин Халкьдин Собраниейиъ айи вакил Нюсрет Уьмаров, РД-йин НС-дин депутат Алавудин Мирзабалаев, РД-йин юстицияйин министрин заместитель Рабият Акавова, Табасаран Райондин глава Мягьямед Къурбанов ва жарадар иштирак гъахьну.
БицIидарин багъ, РФ-дин 2018 – 2025-пи йисариз «Образованиейин артмиш’вал» программайиинди, РД-йин заказниинди «Мектебдиз улихьна вуйи ва уьмуми образованиейин артмиш’вализ кюмек» федеральный программайин дахилнаъди тикмиш гъапIуб ву. БицIидарин багъ – кьюб мертебайин хулар – 1167 квадратдин метр йишв’ин дивна, душваъ шубуб десте бицIидариз вари шараитар яратмиш дапIна. Лазим вуйиси рягьятвал гъадабгъру, тамшир апIру, музыкайин дарсар кивру йишвар, медицинайин кабинет, кухня, уьл ипIру йишв, гьяятдиъ тамшир апIру майднар вари ккабалгна.
Нюсрет Уьмаровди ва Алавудин Мирзабалаевди СиртIич гъулан жямяаьт цIийи багъ ачмиш апIбахъди тебрик гъапIнйи.
«Мектебдиз улихьна вуйи образованиейин идарйирихъди бицIидар тямин апIбан ляхин давам шула. БицIидар вари терефарихъан тербияламиш апIуз шартIар айи, деврин тIалабариз жаваб тувру гьаму жюре багъ тикмиш апIувал – думу республикайин яшайишдинна экономикайин ва ихь ватандашарин дуланажагъдин артмиш’валин дережа улихь гъабхурайи саб гам ву. Ухьу ихь бицIидарин гележег бахтлуб, акуб апIбан бадали вари кьувватар сарф дапIну ккунду», – гъапну Нюсрет Уьмаровди.
Табасаран райондин администрацияйин терефнаан Мягьямед Къурбановди 1-пи сентябриз бицIидариз гьамциб пешкеш апIбаз, райондиз гьамциб фикир тувбаз РД-йин Правительствойиз, Республикайин кIулиъ айи Сергей Меликовдиз чухсагъул мялум гъапIнийи. «СиртIич гъул Табасаран райондин аьхю гъуларикан саб ву. Мушваъ бицIидарин багъ ачмиш апIбаз гизаф ккилигурайи. Хъа гьаддинди ляхин ккудубкIурадархьа, гъулаз шидра зигурахьа, хъа гъюру йисаз СиртIичарин мектеб капремонтдин программайик кипна. Думу вари РД-йин Правительствойин ва райондин администрацияйин, гъулан улихь-кIулихь хьайидарин сатIи вуйи ляхнин натижа ву», – аьлава гъапIну М.Къурбановди.