Пирмягьямед Кьасумов
АцIуцIай
Аржалсиб уьру рягърягъ чан
Дазабгнайи жангар даттлин.
Мухрин зиквар дарин ухшар
Ургуб рангназ деккучIимрин!
– Уь-уь, уь-уь, уь-уь! хъана
Яваш дар уьъйир апIбахьан.
– Хялижв гъюра, даахначва? –
Даттли кадабгъна чав чакан.
– Аллагьисан, ул мапIанай,
– КIура бабу, – АцIуцIайиз.
Дидик гафар макаанай,
Кубсру. Датт лап цIасиб вуйиз!
«Хялижв гъюра!» – кIури, даттли
Гъира кучIал гъапIну бабаз.
Амма думу убккдар ахълиз,
Убккай, дупна адашдиз, гъаз.
–Гьаз мици, баб? КучIлях гъибтну
Убккурчва ихь аькьюллу гьаз?
Бабу худлиз, униъ итну,
Жаваб туву, убккурдарш гьаз…
– Уь-уь! Гъудужв, гвачIин шула!
Бабаз хабар дебккра даттли.
Шад духьнайи худли кIура:
– Узхъандира ккабхь, баб, ахъли!
=============================================================
Рустам Къурбанов
Чиркквар
Хьадукра лизи пеъли саб
Чиркквар учIвугну йицIисаб:
Лизи, уьру, кIару рангнан –
Уччвудар лап аьламатнан.
Сабнуб лизибдиз тай шулдар,
Эгерки жара рангнандар
Ухьу сатIиди гъадагъиш
Ва лизидарихъди тевиш.
Уьру чиркквартIан кIарудар
СабдииндитIан артухъ дар.
БицIи урхрур, увуз суал:
Гьарсаб рангнан чиркквар швнуб а?
======================================================
Аьбдулмажид Къурбанов
Гьисаб апIуз дубгъурача
«Саб», «кьюб», «шубуб» –
Учу дарснаъ
Гьисаб апIуз дубгъурача.
Хъасин «юкьуб»
Ва «хьубсана»
ЦIиб кьандиси дургъуз ккача.
Инсандиз а
Саб мелз, саб кIул,
Саб ву ушв ва хъюхъра ву саб
Кьюб лик, кьюб хил,
Кьюб иб, кьюб ул –
Рягьятди ву апIуз гьисаб.
Анжагъ «шубуб»
Гьисаб апIуз
ТIубарииндитIан шулдар:
Саб тIуб, кьюб тIуб
Ва шубуб тIуб –
Гьисаб апIуз читинди дар.
************** ******************** ************************
Адугъай-дугъай
Шагьвелед Шагьмарданов
Метаграммйир*
Т айиган аьхириъ йиз,
Ухшар вуза узу сундхиз.
Шв дивиш ерина Т-йин,
Арчул хил шулза устайин.
***
Ш-йилан вуза ликрин кюгьне гъаб,
Улихьди узуз гьюрмат вуй жараб!
Эгер Ш гьапIиш КЬ гьярфназ дигиш,
Шаириз шулзу гизаф бегелмиш.
***
Кь-йилан вуза гъидкьин гъюдли чIукI,
Х-йилан – уз’ин аргъаж шулу укI,
Хъа кюкйир кIуруш – бул ву гьар рангнан,
Гъ-йилан ахмиш шулу шид уз’ан.
***
Аьхириъ З айиган йиз,
Гюзгдик дишла кабхъру пис зиз.
Хъ С-йиз З гьапIиш дигиш,
Жилижвуван ччвур шул дюзмиш.
______________________________________________________________
*Жюрбежюр гафар жин дапIнайи дургъунагъарин жюре вуйи метаграммайиъ хъипнайи саб гаф хъидипган, дидиъ саб гьярф дигиш апIуру, ва цIийи гаф арайиз гъюру.
_______________________________________________________________________________
Дургъунагъар
Дябкъну, думу ву гакIвлин кьатI,
Хъа хусусиб ву дидин хатI:
Диди, ашра чаъ мелз рукьан,
Шулдаршра саб гаф пуз чахьан,
ГакIвликан, дапIну цIалцIам,
Уьмарат апIуру тIарам.
Фувуш думу, йиз бицIи дуст,
Ухди йипа, дархьиди суст.
***
Силбар ашра, кIул алиб дар,
Рижв хъашра, ликар ккайиб дар.
Хъа аьламат ву саб ляхин:
Силбар гъатраъ арсри жилин,
Гъайгъушнаъ учв шулу укIан,
Чаз хайир адаршра дидкан.
***
Дябкъну ухшар вушра кьутIраз,
Асла меълиб дар учв дадназ.
Шад апIуруш кьутIру иштагь,
Аьхъюшин ву дидин гьякь шагь.
КьутIран юрд вуш чвулин бистан,
Дидин йишв ву шюмгъяр хулан.
КьутIраз хуш вуш ригъдин гъиллигъ,
Думу ишуру, гъябкъган ригъ.
============================================================
Абйирихьан — наслариз
Муслим Къурбанов
Харжир вушра баб ву дада.
Увуз жарар дидрихъурда
***
Ватан вардиз ву гирами,
Икрам апIин дидиз даим.
***
БицIиб вушра кьалуб вуш нир,
Дидик кучIвуз ихтият йихь
***
Нубат алдру лиж зат мабхан,
Гъач дарпирин хулаз мягъян
***
Аьхюриз гьюрмат адру хал
Гъулазра ву чиркин аьмгъял
***
Темпел касдин кесп гьадму шул,
Тавра кабхъну гъилицнац хьуб.
======================================================
********* *********** ************
Фикир апIин, хъа жаваб тув
Эгер йишвну сяаьт 12-ди мархь убгъураш, 72 сяаьтдилан ригъ али йигъ хьибди пуз шулин?
***
Фундар шюхъяри нирин тмуну гъирагъдикна ухди сирнав апIиди – уьрдгин дарш пеълин шюхъяри?
***
Колобокдин кушарин ранг фициб ву?
***
Эгер хьуб гатди хьуб дакьикьайин арайиъ хьуб кьюл дисуруш, саб гатдиз саб кьюл бисбан бадали швнуб дакьикьа лазим шул?
=========================================================
******* ********* ******** ********
Кроссвордин кьутабариъ исихъ тувнайи цифрйир, вари ушрубси, дикI. (лиг шиклиз)
10
12
17
98
100
105
222
238
243
319
358
510
571
745
775
899
3578399
192581756
354393790
913141598
_________________________________________________________
**********************************************
Жут адру йифун цIирикIв абг (лиг шиклиз)
***********************************************
