Гъубшу гьяфтайиъ, сентябрин 21-пи йигъан, Урусатдин Федерацияйин Президент Владимир Путинди бегьем дару мобилизацияйин гьякьнаан вуйи указдиин къул гъизигнийи. Гьадму йигъан мобилизацияйин серенжемарра ккергънийи. Вари уьлкейиъси, Дагъустандин военный комиссариатдира гъизгъинди ляхин апIуз хъюгънийи. Указ кьувватнаъ убчIву йигъан, республикайиан Ватандин улихь чпин буржи тамам апIуз гьязур вуйи ватандашар ади, автобусар рякъюъ учIвнийи.
Урусатдин Федерацияйи Украинайиъ гъабхурайи хусуси метлеб айи дявдин операцияйин гьякьнаан вари инсанарин фикрар сабсдар дар. Гьелбетда, вари инсанари уьлкейин къанунарихъан, гележегдихъан жавабдарвалра гъабхурадар. Гьаддиз гьарсар инсанди чан кисейиан гафар апIура. Хъа, йиз фикриинди, уьлкейин кIулиъ айириз чан вазифйир чаз ужуди аьгъя, гъи дугъу гъалатI дапIну, уьлкейин гъирагъар мюгькам дарапIиш, гележегдиъ ихь баяр-шубарин веледари дугъ’ин няна алапIиди.
Табасаран халкьдин вакилари ихь гьюкуматдин кIулиъ айирин буйругъар гьаммишан лайикьлуди тамам апIуру. Гьаму ражарира кьяляхъ гъузундар. Украинайиъ гъябгъюрайи дявдин операцияйиъ жвуван хушниинди иштирак хьуз гьязур вуйиваликан РД-йин Халкьдин Собраниейин образованиейин ва илимдин комитетдин вакил Расим Гьяжиагъаевди (шиклиъ) мялум гъапIну.
РД-йин Халкьдин Собраниейин председателин сарпи заместитель Юрий Левицкийди, Расим Везирханович рякъюъ тIаъри, къайд гъапIганси, дагълуйир гьарган Ватан бадали чпин жан дивуз гьязур вуйивалиинди тафавутлу ву.
«1999-пи йисан Дагъустандин аьдати ватандашари, Урусатдин армияйихъди уьлкейин сабвал уьбхюри, багъри ругар вари халкьарин террористарин гьюжмиккан гъюрхну. Гъи ихь депутат Расим Гьяжиагъаев, чан гъуландарихъди сабси дявдин операция гъабхурайи йишваз гъягъюз гьязур духьна. Расим вари жюрейин серенжемариъ иштирак шлу, чан фикир ачухъ апIру, тешкиллувалин теклифар дивру депутатарикан сар ву», – гъапну Юрий Левицкийди.
«Гъи ухьу, жямяаьтди, армияйи Президентдин къарарин тереф уьбхюрахьа, улихь дивнайи месэлайин гъавриъ ахьа. КIулин командующийди улихь дивнайи месэлйир вахтниинди тамам дапIну, Расим Везирхановичдиз депутатарин жергйириз кьяляхъ гъювал ккун апIурача. Ягъурлу рякъ ибшри!», – гъапнийи чан улхбаъ парламентдин председателин заместитель Сайгидягьмед Аьгьмедовди.
Расим Гьяжиагъаевди гъарашугъариз чухсагъул мялум гъапIнийи ва учв хусуси метлеб айи дявдин операция гъябгъюрайи йишваз гъягъюз къарар кьабул апIбан себебнакан гъапнийи:
«Узу улихьнаси, рягьимлувалин кюмек хьади, думу аьтрафариъ гъахьунза. Украинайиъ нацистари зулум апIурайи халкьар ихь кюмекназ гизаф ккилигурайи. 2014-пи йисхъан мина дурар гьар йигъандин йивбарикк, гьюжмарикк кка. Уьлкейин КIулин командующийин къарар гизаф мюгькамуб ва кьягьялвалинуб ву. Гьаддиз узу Президентди дивнайи метлебарин тереф уьбхюраза ва дурар кIулиз удучIврувалин гьич саб шакра адар. Узуз уьлкейин ихтиярар уьрхюрайи ихь эскрарин кIван рюгьнан мюгькамвал гъябкъюнзуз.
Узуз гъябкъюбдин ва узу гьисс гъапIубдин кьяляхъ, дявдин операцияйиъ иштирак хьуз къарар кьабул гъапIунза. Дагъустан чан игит баяриинди гьарган машгьур ву. Узуз военный комиссариатариан повесткйир дуфнайи баярихьна илтIикIуз ккундузуз. Ухьуз варидариз хизанар ахьуз, гъавриъ аза, дадйириз чпин баяр дявдиз гьауз гизаф гъагъиди ву. Хъа гьамусяаьт жара чара адар. Ухьу душман терг дапIну ккунду, сатIиди думу ляхин апIидихьа», – гъапну Расим Гьяжиагъаевди.
Хъа ич газатдин журналистдихъди сюгьбатнаъ Расим Гьяжиагъаевди къайд гъапIганси, Ватан, дадаси, саб ву. Баяр, Ватанди дих гъапIиган, гьарган гьязурди духьну ккунду.
Расим Гьяжиагъаевдиз, гъуландарин, Хив райондин, табасаран халкьдин терефнаан ягъурлу рякъ, душмандиин гъалибвал гъадабгъну, жвуван хизандихьна игитси кьяляхъ гъювал ккун апIурхьа!
Хив райондин кьягьялар ватан уьбхюз гьязур ву
Гъябгъюрайи йисан 21-пи сентябриъ Урусатдин Президент Владимир Путиндин къул алди удубчIву бегьем дару мобилизация мялум апIру указдиз асас вуди, Хив ва Агъул районарин военкоматдиан саб кьадар жигьилариз повесткйир гъафну.
Повесткайизра ккилилигди, Ватанди гъюнариин иливнайи буржи заан дережайиъди ва лайикьлувалиинди тамам апIуз юкIв хъайидарин кьадарра Хив райондиъ цIиб дар. Дурарин арайиъ, имбудариз нумуна улупури, Халкьдин Собраниейин депутат, Ургъа гъулан агьали Расим Гьяжиагъаев, Хив райондин Дардаркент гъулан депутат Селимхан Киберов, ЦIийи Фрюгъярин гъулан депутат Ариф Тажибегов ва жарадар а.
Хив ва Агъул районарин военный комиссар Пирмягьямад Къубачевди фукьан чпиз читинди вушра, мобилизацияйиз ваъ дарпи, кьягьялвалиинди ватандихъан юкIв убгру гьиссар айи веледар тербияламиш апIбаз райондин жямяаьтдиз, асас вуди Яракк, Гъвандикк, Мажвгул, Хирижв ва Ургъа гъуларин администрацйириз, мектебариз ва абйир-бабариз чухсагъул мялум апIура. Гъит ихь жигьилар Аллагьди гюллйирихьан ва зийнарихьан уьрхри!
