Сентябрин 28-пи йигъан Дагъустандин Глава Сергей Меликовди региондин ва федеральный СМИ-йин журналистарин мобилизацияйин гьякьнаан вуйи суалариз жавабар тувну.
Дугъу къайд гъапIганси, уьлкейин кIулиъ айири мялум гъапIу бегьем дару мобилизация давам шула. Мобилизацияйин буйругъар ва месэл-йир улупнайи графикдиз асас вуди кIули гъахура. Думу ляхин гюзчиваликк кка.
Сергей Меликовди чан улихьдин улхбаъ бегьем дару мобилизация тешкил апIруган, военкоматарин, бязи районарин ва шагьрарин главйирин ляхниъ гъалатIар гъахьиваликан гъапнийи. Журналистари, думуган деету гъалатIар дюз апIуз дубхьнаш, суал тувнийи.
«Призывдиз дуфнайидар – гьякьлу мялуматарин дакьат ву. Гьадрарихъди вуйи гюрюшариз фикир тувну, ляхниъ дигиш’валар тIаъну ккунду. Военный комиссариатарин гъуллугъчйирин пишекарвалин ери исди вуйивалира чан «маш» улупну. Гьаму аьгьвалатнаъ коллективдин албагу ляхин лазим вуйи. Аьхиримжи йицIбариинди йисари мициб ляхин ухьуз алабхъундайи. Натижайиъ дюз дарди гьязур гъапIу документари, дюз дару мялуматари агьалйирин наразивалар арайиз гъахну.
ГъалатIар гюзчиваликкна гъадагъна. Швнуб-саб «горячая линия» ачмиш дапIна. Вари суалар районариз гьаънайи РД-йин Главайин ва Правительствойин вакиларин гюзчиваликк кка» – жаваб тувнийи С.Меликовди.
Экспертарин фикриинди, Дагъус-тандиъ гъахьи наразивалин акцйир Украинайиан ва Турцияйиан вуйи соцсетари тешкил гъапIдар ву. СМИ-йин вакилари, думу ляхниз аьксивал улупбан бадали, аьлава серенжемар гъахбанди вуш, гьерхнийи.
Дагъустандин кIулиъ айири гъапиганси, жямяаьтлугъдин къайдасузвалар арайиз хувал Украинайин яракьлу кьуватарин кIулин управлениейин разведкайин хусуси мяна айи идеология-йин ва психологияйин центрин ляхин вуди гъабхьну. «Узуз дагъустанлуйир гъавриъ духьну ккундузуз, къайдасузвалариз уч хьувал ккун апIрудар ихь Ватан уьбхюрайи эскрар йивну йихурайидар ву. Гьаддикан фикир апIинай», – гъапну Сергей Меликовди.
Госдумайи мобилизацияйин дахилнаъди хусуси метлеб айи дявдин операцияйиз гьаънайидарин хизанариз кюмек тувбан месэла гьял апIура. Хъа игьтияж айи хизанариз жаради кюмек тувбанди ву.
Сергей Меликовди гьарсар эскриз, дурарин кьягьялвализ, дадйирин, хпарин, чйирин сабурлувализ чухсагъул мялум гъапIнйи.
