5-пи октябриъ Мягьячгъалайиъ Урус драмтеатрин залиъ мялимарин пишекарвалин йигъаз бахш дапIнайи шадлугънан серенжем кIули гъубшну.
Душваъ республикайин вари районариан ва шагьрариан варитIан ужударсдар мялимар ва РД-йин Правительствойин вакилар иштирак гъахнийи.
Серенжем концертдин программа улупбалан ккебгънийи. Хъасин, мялимар пишекарвалин машкврихъди тебрик апIури, РД-йин Правительствойин Председатель Аьбдулмуслим Аьбдулмуслимов удучIвну гъулхнийи.
«Правительствойин терефнаан ихь мялимариз, образованиейин тешкилатарин улихь-кIулихь хьайидариз, мектебариъ, лицеяриъ, гимназйириъ, колледжариъ лихурайидариз варидиз пуз ккундузуз, учу ихь республикайин образованиейин гъурулуш улихьна гъабхбаз ва артмиш апIбаз асас фикир тувувал давам апIидича. Мялимдин ад за, цIийи мектебар тикмиш, айидар рас апIувал, дурар гьамусдин деврин лазим вуйи алатарихъди тямин апIувал ва мялимдин зегьметназ лайикьлу кьимат тувувал – гьамрар вари учу сабпи нубатнаъ тамам дапIну ккуни месэл-йир вуди тяйин дапIнача», – гъапну, серенжемдиз уч духьнайидарихьинди илтIикIну, Аь. Аьбдулмуслимовди.
Дугъу гьацира мялум гъапIганси, Каспийск шагьриан вуйи мялимди гьаму йигъари «Урусатдин мялим – 2022» вари Урусатдин конкурсдиъ иштирак’вал апIура. «Ихь мялимари федеральный дережайиъди вари Урусатдин пишекарвалин конкурсариъ Дагъустан лайикьлувалиинди улупурайивал дамагълуди къайд апIуз ккундузуз», – гъапIнийи республикайин правительствойин кIули айири.
50 йисандин мялимвалин тажруба айи Шихшинатова Зинаида Семеновнайин тясирлу улхбу варидарин кIваз эсер гъапIнийи.
«Ухьу читин заманайиъ яшамиш шулахьа, ва гъи ухьухь урхури гъахьидари, хилиъ яракь дибисну, ихь ватан, ихь кьудратлу Урусат уьбхюра. Гьаз гъапиш Урусатдиъ намуслу, гьякьлу, зегьметниин юкIв али, дирбаш халкь дуланмиш шула. Гьаму гафар гизафси ихь мялимарин терефназ кIурайидар вуйиз. Сабдизра дилигди, вари аьх апIури, читинвалар ккагъуз чара абгури, зегьмет зигурайидариз. Бахтлу ишричву, гъит ичв хулариъ анжагъ ужудар хабрар атIагри!» – гъапнийи З.Шихшинатовайи.
Серенжемдиъ Аьбдулмуслим Аьбдулмуслимовди дагъустандин мялимар гьюкуматдин пешкешариинди лишанлу гъапIнийи. Кьюр мялимдиз «Дагъустан Республикайин образованиейин лайикьлу гъуллугъчи» ва 12 мялимдиз «Дагъустан Республикайин ла-йикьлу мялим» кIуру ччвурар тувнийи.
«Дагъустан Республикайин лайикьлу мялим» кIуру ччвур тувдарин арайиъ ихь ватанагьли, Хючна гъулан 2-пи нумрайин кьялан мектебдин мялим Севиль Аьдиловара а.
Аьбдулмуслим Аьбдулмуслимовди табасаран мялимариз, дирбаш баяр тербияламиш апIурайивализ лигну, жаради чухсагъул мялум гъапIнийи.
«Табасаран район Урусатдин игитар тербияламиш апIурайи мядан ву. Гьаму райондиан гъи варжариинди баяри ихь уьлкейин сяргьятар уьрхюра. Гьякьлу игитар тербияламиш апIбаз учвуз республикайин Глава Сергей Меликовдин терефнаан, вари Правительствойин терефнаан чухсагъул кIураза ва мубарак апIураза!» – къайд гъапIну Аь.Аьбдулмуслимовди.
