ЧIатан гъафи касдин гьякь-гьюрмат уьбхювал, дугъаз лигувал, хулаз теклиф дапIну, саб чIив уьл гьивувал, хъа нагагь думу йишвазди гъузруси гъабхьиш, хялижвди дуфнайириз хуларикан ужубсиб хал улупувал ихь ата-бабйириланмина гъубз-найи аьдат, ирс ву.

 

Йиз гъийин макьала гьаз мици ккебгъраш, думу урхруган гъавриъ хьидичва.

Хив райондин Ляхла гъулаз сумчриз хялар хъади дуфну, дурар дитну, кьяляхъ хъадакну гъягъюрайи Керимхан Ражабовдин машин райондин ЦIанитI гъулазди учIвруган чIур гъабхьнийи.

Пенсионер Гъяякент райондин агьали вуйи. ГьацI рякъюъ машин чIур дубхьну, я таниш йишв дарди, я аьгъю кас адарди, я багар-гурарихь машиндин дерди-бала гьял апIуз мумкинвал тувру тукан хьтарди, гьапIрушра аьжуз духьну, кIваан йицIуб жюрейин хиялар гъягъюрайи Керимхандиз Урусатдин Хив райондиъ айи МВД-йин ОГИБДД-йин гъуллугъчйир бакар гъахьнийи.

Чаз дурарин ччвурар мялум даршра, кюмек тувну чав рякъ’ин апIбаз чухсагъул мялум апIури, пенсионери «Табасарандин нурар» газатдин Telegram канализ гъибикIнийи.

Ахтармиш апIуруш, дурар Шамил Мягьярамов, Идрис Насруллаев ва Гьяжибала Исаев вуйи.

Газат урхру ихь ватанагьлийириз му дюшюшдикан кьюб келима пуб ккун апIури, Гьяжибала Исаевдихьна илтIикIнийза.

«Саб артухъ тяриф апIруб фукIа гъапIундарча. Ич йишв’ин жарар фуж гъахьнийишра, хъа чавра ихь райондин элугълийи, гьациб кюмек туврубдиин умудлу вуза. Йигъ лисун дубхьнайи. Мициб вахтна учу, аьдат вуйиганси, райондин гъуларилан ул илбицури, чарх йивури шулча. Гьаци ЦIанитI гъулазди учIвруган, машиндин капот за дапIну, кефйир адру халу гъяркъюнчуз. Халуйин багахьна дуфну, кюмек апIбан теклиф дивнийча. Машин хъибтIуз думу рази гъахьундайи. Гьаддиз думура хъади Хив ва Кьасумкент районарин машинарин алатар тувру туканарилан илдицну, герек вуйи алатар масу гъадагъну, дурар хьади машиндихьна кьяляхъ дуфну ва машиндик кивну, халу рякъ’ин гъапIунча. ЧIур шлудар, уьргърудар машиндин рукьар ишри. Хъа дицдар читин месэлйир гьял апIуз, дюз алауз ухьусдар, Аллагь кIваин али кьягьялар сагъ ишри», – кIура Гъвандикк гъулан бай Гьяжибалайи.