Урусатдин Федерацияйин Силисчивалин комитетдиъ, дидин председатель Александр Бастрыкиндин табшуругъниинди, хусуси метлеб айи дявдин операцияйин иштиракчйириз, бегьем дару мобилизацияйин дявдин гъуллугъчйириз ва дурарин хизанариз кюмек вуди, «горячая линия» ачмиш дапIна.
Гьамус дурарихьан суткайиъ 24 сяаьтна, яна зат хътудубтIди, телефондин 8-800-100-12-60 нумрайиз зенг апIуз шулу.
Урусатдин Силисчивалин комитетдин гъуллугъчйири, жюрбежюр сулариз жавабар туври, арайиз гъафи читинвалар гьял апIбаъ, гьадму гьисабнаан медицинайин, туврайи пулин ва яшайишдин жара уьлчмйирин гьякьнаанра кюмек тувиди.
«Горячая линия» ачмиш апIували зиихъ дупнайи гъатарик кахьрайи агьалйириз вари терефариан чпин ихтиярар уьрхюз мумкинвал хьибди», – къайд апIура идарайиъ.
Дидин ляхин Силисчивалин Комитетдин Председатели чан хусуси гюзчиваликк уьбхюра.
Гьацира Урусатдин Силисчивалин комитетдиз жюрбежюр суалар хьади дидин мялуматарин центрин официальный аккаунтарианминара илтIикIуз шулу:
ВКонтакте социальный сетдиъ –СК-йин председателин приемныйдиз – vk.com/priemnaya_bastrikina ва мялуматарин центрин дестейиз – vk.com/infocentrskrf; Телеграм-каналиъ – t.me/infocentrskrf; Одноклассникариъ – ok.ru/infocentrskr; Дзен-каналиъ – dzen.ru/infocentrskrf.
КIваин апIурача, Урусатдиъ бегьем дару мобилизация мялум дапIну 3 гьяфта ву. 23 регионди чпиз улупнайи план тамам дапIну ккудубкIуваликан гъапну. Гьадму саб вахтна, садпи йигъа-рихъанмина хъюгъну, бегьем дару мобилизацияйин гьякьнаан аьрзйир уч апIурайи ОНФ-дин улупбариинди, 25-пи сентябрихъан 10-пи октябриз агьалйирихьан 33 агъзуртIан артухъ аьрзйир гъафну, гьадму гьисабнаан 7 агъзур военкоматарин гьяракатарин гьякьнаанра. «Горячая линия» ачмиш апIували агьалйириз хусуси метлеб айи дявдин операцияйиъ игитвалиинди иштирак шулайи чпин багахьлуйирикан жюрбежюр мялуматар гъадагъуз гъулайвал хуз гъитрувалин саб шак адар.
Арайиз дуфнайи аьгьвалатнаъ фунубра хизандиз, абйир-бабариз фициб вушра мялумат чарасуз лазим ву. Хусуси метлеб айи дявдин операцияйиъ агъзрариинди ихь ватанагьлийирира иштирак’вал апIура, бегьем дару мобилизация мялум гъапIган, чпин хушниинди гъушдарра хайлин а.
Гъит дурарикан гъюру мялуматар гьарсаб хизандиз шадвал, абйир-бабарин юкIвариз саламатвал туврудар ишри.
Му гъагъи йигъар-вазар шлубкьан ухди ккудукIну, дурар чпин хизанарихьна гъалибвал хьади гъюри.
