Москвайиъ Урусатдин писателарин ва китабар чап апIрударин союзарин ассоциацияйин (АСПИ) милли литературйир артмиш апIбаз бахш дапIнайи проектдин дахилнаъди Дагъустан халкьдин писатель Шагьвелед Шагьмардановдин «Хьадукран хлинццикк» кIуру урус чIалниинди вуйи китаб чапдиан удубчIвну.

 

 

19-пи октябриъ Дагъустандин писателарин союздиъ китабдин презентация гъабхьну. Серенжемдиз Мягьячгъалайиъ дуланмиш шулайи табасаран халкьдин интеллигенцияйин бязи вакилар, аьлимар, мялимар, редакторар, шаирар ва журналистар уч духьнайи. Думу кIули гъубхур республикайин «Литературайин Дагъустан» ва «Ппази» журналарин редакцияйин кIулин редактор Мурад Аьгьмедов вуйи.

Серенжемдиъ удучIвну гъулхдари шаирин адресназ хайлин ужудар гафар гъапнийи ва дугъаз яратмиш’валин рякъюъ хъана цIийи хъуркьувалар хьуб ккун гъапIнийи.

РАН-дин ДФИЦ-дин илмин аьхюну гъуллугъчи Шарафудин Дашдемировди чан удучIвну улхбаъ милли чIаларин читин дубхьнайи месэлара гъитIибккнийи.

«Гьамусяьт дюн’яйин бязи чIалар саб жерге гьяйванатарна набататартIан ухди дюн’яйилан дургура, амма гьяйванатаринна набататарин гъайгъушнаъ ади, жюрбежюр уьлчмйир кьабул апIураш, чIаларин гьякьнаан, гьяйифки, дициб гъайгъушин рябкъюрадар. Вари чIаларикан 40 процент зат имдарди дургувалин къурхулуваликк кка. Гьамциб пашман аьгьвалатнаъ бабан чIалнан ва литературайин тереф уьбхюри, дурар артмиш апIури алдабгъурайи гьарсаб лик аьхю эгьемият айиб ву», – гъапну Шарафудин Закиевичди.

Шагьвелед Шагьмардановдин цIийи китабдиъ дугъан улихьна йисари гъидикIу прозайин машгьур эсерар – «Жихрин гьар» ва «Чюнгюр» повестар, «Хьадукран хлин-ццикк» пьеса, новеллйир ва бицIидариз вуйи ихтилатар, урус чIалназ таржума дапIну, тувна. Таржумачйирра дагъустандин шаирар Владимир Носов, Александр Карапац ва Зарифа Мурсалова ву.