Хабаровск крайдиъ Дагъустан Республикайин Правительствойин вакил вуйи Бейдулагь Исаев улихьнаси нубатнан ражари багъри Хив райондиз хялижвди гъафнийи.
Дугъахъди Хабаровск ва Самара шагьрариан Дагъустандин халкьарин сабвалиин, гьацира такабур йишвариин, юрдариин аьшкьламиш духьнайи, туриствалин хатI кайи делегацияра хъайи.
Табасаран халкьдин халис аьдатар гюзет апIури, дурар райондин сяргьятариина хъуркьайиз, Хив райондин администрацияйин, РКДЦ-йин гъуллугъчйири музейин хялар кьабул апIру хулаъ ачухъ суфра ккипнайи.
Хуш-беш апIбалан ва ушв гьибтбалан кьяляхъ, дурар музейиъ айи кюгьне мутмйирихъди ва алатарихъди таниш гъапIнийи, дурариз табасаран халкьдин сяняаьтарикан, халкьдин дамагъ ва ирс вуйи халачйирикан, гьалварикан ва дарушкйирикан ктибтнийи, ва халкьдин мяълийирихъди урхбан саягъниинди гьязур дапIнайи сягьнара улупнийи.
Чахъди хъайи хялариз, гьацира миди вуйи ярар-дустариз, чIатар-чIурарикан, дагълар-багъларикан ктибтури, ихтилатар ва сюгьбатар, йиз багъри юрднахъди Швейцария тевуз шулдар кIуру зарафатар апIури, Бейдулагь Исаевди чан хусуси TeIegram страницайиъ видеороликарра ирчна. Хъа якьинди ухьухьна гъюз иштагь айидариз, зарафатсузди гъачай, буюр кIури, теклиф апIура.
Думу райондин глава Ярмет Ярметовдихъдира гюрюшмиш гъахьну. Сюгьбатнаъ Бейдулагь Исаевди райондин кIулиъ айириз гъи, вари Урусатдиз гъагъ алабхънайи вахтна, ватандиз кюмекнан хил гьачIабккурайивализ, уьлкейиъ гъябгъюрайи бегьем дару мобилизацияйин гьякьнаан райондин агьалйир дюзди гъаврикк ккаърайивализ лигну, халкьдин терефнаан чухсагъул мялум гъапIну. Ватан уьбхюз гъягъюрайи йицIбариинди ва гьацира хусуси метлеб айи дявдин операцияйиъ иштирак шулайи варжариинди кьягьялариз туврайи кюмекнан, ва гьацира эскрариз райондиан алабхьру мани палат ва ипIру-убхъру сурсатар хътаурайивалин важиблувалра къайд гъапIнийи ва дурар давам дапIну ккуниваликан гъапнийи.
Чпин улхбаъ дурари гъябгъюрайи йисан ноябрин вазлин аьхириъ ихь ватанагьли, «Урусатдин Игит» заан ччвур тувнайи генерал-майор, Луганскдин Халкьдин Республикайин Игит, ЛНР-ин халкьдин милицияйин 2-пи армияйин корпусдин командующий Эседуллагь Абачевдин бахш дапIну, армияйин хиларихъди кчIихбан спортдин жюрейиан турнир кIули гъабхуз йикьрар гъапIнийи.
