Варж агъзур манат тувди
Гъи ихь вари уьлке Урусатдин Федерацияйи гъабхурайи хусуси метлеб айи дявдин операция ккудубкIбаз ккилибгура. Амма сабан дидин аьхир ухьуз рябкъюрадар. Чпин хизанар дирчну, Ватандин маракьар уьрхюри, дявдин операцияйин сабпи жергйириъди женг гъабхурайи ихь эскрариз гьамусяаьт варитIан гъагъиди а. Дурарикан фикир дарапIру, дурар сагъ-саламатди чпин хизанариз кьяляхъ гъювал ккун дарапIру касар ихь арайиъ гьичра адаршул. Гьюкуматди, йишвариин ерли гьюкмари мобилизацияйин дахилнаъди дявдин операция гъябгъюрайи йишвариз душнайи ватандашарин хизанариз кюмек тувра.
Ухьуз мялум вуйиси, Дагъустан Республикайин Правительствойи мобилизацияйин дахилнаъди ва чпин хушниинди Ватандин маракьар уьрхюз Урусатдин Федерацияйин Яракьлу кьувватарин жергйириз душнайидарин, 2022-пи йисан 24-пи февралихъанмина Урусатдин Федерацияйи гъабхурайи хусуси метлеб айи дявдин операцияйиъ иштирак шулайидарин хизанариз пулин кюмек тувбан къарар кьабул дапIна.
КIваина хурача, улихьнаси республикайин Глава Сергей Меликовдин табшуругъниинди, думу метлебариз РД-йин Правительствойин резервдин фонднаан 350 миллион манат жара гъапIнийи.
Саб ражари тувру пулин кюмек гъадабгъбан бадали, мобилизацияйин дахилнаъди ясана чан хушниинди СВО гъябгъюрайи йишваз душнайи ватандашдин хизанар Дагъустан Республикайин аьтрафариин регистрация дапIнади ккунду. Думу пул тувуб ккун апIури, эскрин хпирихьан, абйир-бабарихьан, бицIидарихьан аьрза тувуз шулу, хъа эгер дицисдар багахьлуйир адарш, пулин кюмек жвуван хушниинди ясана мобилизацияйин дахилнаъди душнайи ватандашдиз тувру.
Къайд апIурача, саб ражари тувру пулин кюмекнан кьадар 100 000 манат ву. Аьрза тувбан кьяляхъ, пул 5 йи-гъандин арайиъ тувну ккунду.
Дагъустан Республикайиъ думу пул муниципальный районарин ва шагьрарин округарин агьалйирин яшайишдин тереф уьбхру идарйириан тувди.
Эскрариз кагъзар гъидикIну
Ихь яракьлу кьуватарин эскрариз кюмекнан хил гьачIабккру инсанарин кьадарра йигълан-йигъаз артухъ шула.
Жямяаьтлугъ тешкилатар, бизнесдин вакилар, волонтерар, студентар, мектебариъ урхурайи бицIидарра кмиди чпихьан удукьру кюмек тувбиин машгъул духьна.
Хючна гъулаъ айи Табасаран райондин гимназия, райондин жигьиларин центрин тешкиллувалиинди, вари Урусатдиъ кIули гъябгъюрайи ва «Эскриз кагъаз» ччвур тувнайи ватанпервервалин акцияйиъ иштирак гъабхьну. Гимназияйиъ урхурайидари Урусатдин армияйин жергйириъди хусуси метлеб айи дявдин операцияйиъ иштирак шулайи эскрариз кагъзар гъидикIну. Му акцияйин гьякьнаан узу гимназияйин директорин тербия тувбан ляхнарихъан жавабдар заместитель Гьаваханум Байрамялиевайихъди телефондиан сюгьбат гъубхнийза.
«Ич гимназияйиъ ватанпервервалин тербия тувбан ляхниз гизаф фикир тувра. Урусатдин Федерацияйи хусуси метлеб айи операция ккебгъбахъан мина гимназияйиъ, ихь эскрарин тереф уьбхюри, жюрбежюр серенжемар гъахура. Магьа гъира гимназияйиъ ватанпервервалин серенжем гъабхурача. Улихьнаси Ургур чвуччвун гъалайиин дявдин СВО-йин иштиракчйирихъди кIули гъубшу гюрюшдиъ гимназияйиъ урхурайи бицIидар иштирак гъахьнийи. Дурари дирбаш эскрариз, дурарин гьунарариз бахш дапIнайи шиърар гъурхнийи.
18-пи октябриъ «Эскриз кагъаз» акцияйиъра иштирак гъахьунча. Ккергъбан ва заан классариъ урхурайидарин арайиан эскрариз кагъзар дикIуз ккунидар уч дапIну, дурарихъди кагъзар гъидикIунча. Урхурайидари эскрариз вуйи чпин кагъзариъ чвевалин халкьар нацистарин аьзабнаккан азад апIурайивализ чухсагъул мялум гъапIну, кIваз рягьят шлу хуш гафар гъидикIну.
Мидланра савайи, гимназияйин мялимари, эскрариз саб аьхю посылка гьязур дапIну, хътапIунча. Думу посылкайиъ, зийнар илитIру жунайилан, дармнарилан гъадабгъну, итIру сурсатар ва гизаф жара шей’ар айи. Посылка ихь эскрарихьна хъубкьну.
Гимназияйиъ урхурайидарин арайиъ мобилизацияйин дахилнаъди СВО гъябгъюрайи йишваз душайидарин бицIидарра а. Дурар гимназияйин кIулиъ айидарин гюзчиваликк кка», –гъапнийи Гьаваханум Исмяиловнайи.
