Аьхиримжи йисари жигьил табасаран спортсменари чпин хъуркьувалариинди ухьу гизаф рази апIура — дурари жюрбежюр спортдин жюрйириан заан хъуркьувалар гъазанмиш апIбан дюшюшар йигълан-йигъаз артухъ шула. Халкьдиз чан кIубан, бажаранлу баярикан, дурари улупурайи гьунарарикан аьгъяди ккунду, гьаз гъапиш жвуван ватанагьли урхбаъ, ляхниъ, спортдиъ улихь гъягъруган, кIваз шадвалин, утканвалин гьиссар гъюру.
Нубатнан ражну мицдар шадвалин, утканвалин гьиссар уягъ гъапIдар Табасаран райондин «Олимп» кIуру спортдин клуб ва 4-пи нумрайин жигьиларинна бицIидарин спортдин мектеб ву.
30-пи октябриъ Дербент шагьриъ айи 6-пи нумрайин жигьиларинна бицIидарин спортдин мектебдиъ Кафари Дагъустандин 2007-2015-пи йисари бабкан гъахьи спортсменарин арайиъ юкьяр дисбан спортдиан ачухъ турнир кIули гъубшну.
Табасаран райондиан турнириъ «Олимп» кIуру спортдин клубдиъ ва 4-пи нумрайин жигьиларинна бицIидарин спортдин мектебдиъ юкьяр дисбан спортдиан аьгъювалар гъадагъурайи 22 жигьил спортсменар иштирак гъахьнийи. Дурар талитарихьна ужуди гьязур гъапIу тренерар ТIагьир Нуров ва Мурад Аьзизов вуйи.
КIули гъушу талитарин натижйириинди, турнириъ Табасаран райондин командайи сабпи йишв гъибисну. Ихь баяри 6 сабпи йишвар, 7 кьюбпи йишвар, 9 — шубубпи йишвар гъадагъну.
ТIагьир Нуровди гьязур гъапIу спортсменарикан талитариъ сабпи йишвар Ф. Фейзуллаевди (22 кг), Н. Сулеймановди (24 кг), М. Фейзуллаевди (49 кг), Ш. Ражабовди (62 кг), И. Шагьбановди (26 кг); кьюбпи йишв А. Аслановди; шубубпи йишвар Ф. Къурбановди (24 кг), Уь. Аьлиевди (32 кг), Ш. Шиховди (30 кг), М. Сулеймановди (32 кг), Р. Исмяиловди (52 кг), К. Ражабовди (35 кг), Р. Уьсмановди (28 кг) гъадагъну.
Мурад Аьзизовди гьязур гъапIу спортсменарикан талитариъ сабпи йишвар: И. Муслимовди (24 кг), Э. Мягьямедовди (38 кг);кьюбпи йишв Р. Аьбдуллаевди (41 кг) гъазанмиш гъапIну.
Талитариъ гъалиб гъахьидар вари кубкйириинди, дипломариинди ва медалариинди лишанлу гъапIнийи.
Ихь жигьил спортсменар му гъалибвалихъди мубарак апIури, гележегдиъ дурариз хъана заан хъуркьувалар хьуб ккун апIурхьа.
