Ихь уьлкейин яракьлу кьувватари Украинайиъ кIули гъабхурайи хусуси метлеб айи дявдин операция ккебгъну, йицIуб кIуру вазликра кубкIну. Дагълу ифи жандиъ либхурайи агъзрариинди дагъустан баяри дявдин цIин майдандиъ жюрэтлувал улупура. Халис игитариси Ватан бадали ифдин цIадал гьяйиф дарапIри, гъийин йигъаз уьмриан гъушдарин кьадарра цIиб дар.
Йигъ-йишв дарпиди дурари гъабхурайи женгнакан, алдагъурайи ликарикан гьарсариз мялум вухьуз. Мидихъди аьлакьалуди гьар гьяфтайик Дагъустандиан саб-кьюб КамАЗдиъди гуманитарный гъагъ ихь баярихьна рубкьура. Хъа дурари, чпихьан ухьуз жаваб вуди, жандин гьавйир, гевюл ачухъ апIру разивалин гьиссар кайи видеороликар хътаура.
Нубатнан ражари вуди ихь баяриз гуманитарный гъагъ Хив райондиан гьязур гъапIнийи.
Думу ляхин тешкил гъапIдар ва кIули гъубхдар Хив райондин ЦБС-дин директор ва райондин дишагьлийирин союздин председатель Зумрия Сяидягьмедова, райондин депутатарин собраниейин председатель Садикь Исрафилов ва «Саб вуйи Урусат» партияйин инсанар кьабул апIру йишван кIулиъ айи ва гьацира Хив райондин телевидениейин мухбир вуйи Инаят Рамазанова ву.
Му месэлайин гьякьнаан мялуматар гъадагъуз Зумрия Сяидягьмедовайихьна илтIикIнийза. Ич арайиъ гъабхьи сюгьбат жикъиди исихъ чап апIурача.
– Зумрия Эрзимановна, му акция фици тешкил гъапIуб вуйичв?
– Хив район Урусатдиъ гъахурайи саки вари акцйирин терефкар ву. Райондиъ му жюрейин ляхин гъабхувал аьдатназ илтIибкIнайи, Хив райондин глава Ярмет Ярметов кIулиъ ади, вари администрацияйиз, райондин агьалйириз ва саб фила вуш райондиан удучIвну душну гъирагъдиъ чпин мадар апIурайи, хъа гьамциб читин йигъан ухьуз бакар шулайи ва ватанпервервалин гьиссар айи инсанариз чухсагъул пуз ккундузуз. Дюн’яйиз ислягьвал хурча кIури, дявдин майдандиъ гюллдихь мухур гьивну, цIин ялавнаъ айи ихь баярикан, юкIв хилиъ бисну, гьаммишан баярин дихназ ккилигурайи бабарин юкIварикан хабар ади, райондиъ нубатнан ражарира му акция тешкил гъапIнийча. Ва магьа гъалибвал халкьдин сабвалиъ айивал ихь элугълийири субут гъапIну.
– Дурарин терефнаан фициб кюмек гъабхьну?
– Йиз телефондин адрес ва карточкайин нумра кади афиша гьязур гъапIнийча ва WhatsApp-дин группйириз, Telegram-дин каналариз хътапIунча. ЦIиб вахт гъябгъяйизра, ихь ватанагьлийири вари терефариан чпин хилихъ хъайиб, чпихьан удукьруб хътапIуз хъюгънийи. Чпин кюлфетдилан илдипнайи гьарсаб аьбаси Аллагьди кьабул апIри, гъазанмиш апIру жандиз мюгькам сагъ’вал туври! Му имбу шагьрар-районариъси дарди, сар касдинра сад йи-гъандин маважибдик кучундайи. Гьаци вушра, гъуларин администрацйирин вакилари, мектебарин мялимари, техработникари, бицIидарин багъариъ, ФАП-ариъ, библиотекйириъ, почтайин отделен-йириъ ва культурайин хулариъ лихурайи гъуллугъчйири чпин хушниинди хайлин кюмек гъапIну. Уч гъахьи дакьатарихъ ихь баяриз асас вуди алабхьру мани палат ва саб вазлизкьан чIур даршлу итIру сурсатар масу гъадагъури, туканарилан илдицнийча. Дюзди гъапиш, цIиб улихьна йигъари ихь баярихьан гьерхган, дурари чпиз асас вуди герек вуйи шей’арин сиягь хътапIнийи. Мисалназ, кIанккан ккахьру ккурттар, фонарар, ликариин алахьру резиндин чекмйир, чай уьбхру термос, сагъламвал уьбхру рубар-дармнар ва гь. ж. Туканчйириз му шей’ар учу фтихъ ва шлиз гъадагъурайдар вуш мялум гъапIиган, дурарира, чпин адмивал улупуйи, гъавриъ ва гъадриъ ади, кьимат ис апIуйи, ва гьамци сиягьнаъ улупнайидар тамамди масу гъадагъуз удукьнийи. Чан терефнаан акцияйик пай киву гьацдар туканчйирикан сар – ихь райондин УртIил гъулан агьали Аьрабхан ТIаибовра ву.
– Райондин терефнаан рякъ`ин гъапIу гуманитарный гъагъ баярихьна гъурубкьнийин?
– Ав. Хив райондин Ккугъ гъулан агьали Давуд Султановди, варидарихъди чав гъапIу кюмек ктарди, Дагъустандиан гуманитарный гъагъ гъабхурайи машиндихьна райондиан гьязур дапIнайи кюмек гъабхуз чан терефнаан ГАЗелра тувнийи. Мидланра савайи, магьа нубатнан ражарира, учв кIулиъ ади, гуманитарный гъагъ гъабхурайи машиндихъ ихь райондин агьали, жвуван хушниинди дявдин гьяракатариъ иштирак шулайи Замир Гьяжимурадов хъа. Дугъу машин Луганскдин Халкьдин Республикайиз хъубкьиган, учуз дидкан хабар гъапIнийи. Райондин бицIидарин багъариъ ва мектебариъ урхурайи баяр-шубари дизигнайи шик-ларна саламарин кагъзарра хътаънийча. Дурар урхурайи ихь баярин, ЛНР-ин Халкьдин милицияйин кьюбпи армияйин корпусдин кIулиъ айи генерал-майор, Урусатдин Игит Эседуллагь Абачевдин терефнаан, чухсагъул мялум апIури, кагъзарихъан, шикларихъан багъри юрдарин ниъ ва тIяаьм гъюрайиваликан, саб гафниинди, дурарин терефнаан юкIв ачухъ апIру хабрар тувнийчуз.
– Сюгьбатнан аьхириъ ихь ватанагьлийириз фу пуз ккундийвуз?
– Ихь ватанагьлийирикан, шулуш, ляхниинди, дарш кепкиинди вая уччвуб гафниинди вушра кюмек тувуб ккун апIураза. Дарш, хутIил хъапIрайи йицран кIарчарилан маргъ алдатруси, важиблу ляхин апIурайидарин улхьан йивруб дар. Сар шли-вуш мялум дарури, чан гафарин эйсивал апIуз даршлури гъапибдихъ хъугъну, инсанарин ляхниз кьимат дивруб дар. Кайиб вушра, даршра аьгъдарди, чаз гъеебхьубдиин чан терефнаанра иливну, халкьдин кIваан гарп адабхъру гафар дапIну ккундар. ГучIар ккадраишра, халкьдик гьацира гъалабулугъвал ка.
Гьаму йигъари, узуз зенг дапIну, сар касди «увуз ктарш, думукьан ликар алдагъидайва» кIури, гъапIу гафар гьич кIваълан гъягъюрадариз. Дугъаз чан йишв улупунза ва сарун гьацдар аш, гьадраризра жаваб вуди кIураза. Узуз саринра фукIара ккунди адарзуз, я узу апIурайиб рябкъри кIури, медалин сагьиб шулза кIури, хъергнайирра дарза. Узуз йиз ччвур ва намус заан дивузуз. Узуз ккунди айиб анжагъ кIул’ин алтIабгнайи аку зав, халкьдин сабвал ва шадвал, гьацира гъюзимбу наслин аку гележег ву. Узу Аллагьдин улихь марцциди вуза, ва цIин ялавнаъ айи баяриз кюмек апIидиза пну, тувнайи гаф, улихь дивнайи метлеб баркаллувалиинди тамам апIуз чарйир агидиза.
Республикайин Халкьдин Собраниейин депутат, жвуван хушниинди дявдин гьяракатариъ иштирак шулайи Расим Гьяжиагъаевдиз, учв кIулиъ ади, чахъди хъайи баяриз гьамциб гуманитарный гъагъ гьязур апIуз улихь гьучIвруза пну, гаф тувназа. Гьаму йигъари, Аллагьдин амриинди, улихь райондин глава Ярмет Аьлиметовичра хьади, думу гаф кIулиз адабгъидихьа. Аллагь ихь терефкар ишри, чIуру фикрар апIру инсанарин гаф кIанакк, ихь гаф зиин ибшри, гьюрматлу ватанагьлийир!
