Улихьнаси махлукьатлу хабрарин дакьатариан мялум гъапIганси, октябрин 27-пи йигъан кIули гъубшу Дагъустан Республикайин Халкьдин Собраниейин сессияйиъ РД-йин Конституцияйиъ дигиш’валар тIаъбан гьякьнаан вуйи къанундин проект кьюбпи урхбаъди кьабул гъапIнийи. Къанундин проект кьабул апIайиз улихьна, республикайин аьтрафарин битаввалхъан Дагъустандин кIулиъ айири жавабдарвал дубхну ккунивал тIалаб апIури, жямяаьтлугъдин бязи вакилари къанундин проектдиз чпин аьксивал улупнийи. Дурар кьабул апIурайи къанундин проектдин бегьемди гъавриъ адайи. Халкьдин Собраниейин сессия ккудубкIбалан кьяляхъ, Дагъустандин Глава Сергей Меликовди депутатариз халкьдин арайиъ гъаврикк ккаъбан ляхин гъабхувал табшурмиш гъапIнийи.
РД-йин Халкьдин Собраниейин экономикайин политикайин, инвестицйирин ва предпринимателвалин комитетдин председатель Сефер Аьлиев Дагъустандин Огни шагьриз гъушнийи ва шагьрин кIулиъ айидарихъди, жямяаьтлугъдин вакиларихъди гюрюшмиш гъахьнийи.
Гюрюшдиъ муниципалитетдин глава Жалалудин Аьлирзаев, шагьрин администрацияйин гъурулушарин ва гъуллугъарин кIулиъ айидар иштирак гъахьну.
Депут Сефер Аьлиевди парламентдин вакилари РД-йин Конституцияйиъ дигиш’валар тIаъбан гьякьнаан къанундин проект кьабул апIбакан, думу ляхин Урусатдин Конституцияйиъ дигиш’валар тIаъбахъди ва «Урусатдин Федерацияйин субъектариъ халкьдин гьюкум тешкил апIбан уьмуми шартIарин гьякьнаан» Федеральный 414-пи къанун кьабул апIбахъди аьлакьалу вуйиваликан ктибтнийи.
Депутатди къайд гъапIганси, Урусатдин Федерацияйин вари субъектари чпин конституцйириъ думу жюрейин дигиш’валар тIаъра, 30-тIан артухъ регионариъ дигиш’валар тIаъну ккудубкIна. «Аьтрафарин битавваликан улхуруш, уьлкейин аьтрафарин битаввалихъан, субъектарра гьисабназ гъадагъну, Урусатдин Федерацияйин Президентди жавабдарвал гъабхура. РФ-дин Конституцияйин 67-пи маддайиъ дупнайиганси, субъектарин арайиъ айи сяргьятар, дурарин чпин арайиъ разивал адарди, сарихьанра дигиш апIуз шулдар», – гъапнийи Сефер Аьлиевди. Дугъу республикайин аьтрафарин битавваликан агьалйирин суалариз жавабар тувнийи.
Думу месэла гьял апIбан кьяляхъ, депутат чахьна илтIикIурайи сечкичйирин жара месэлйир гьял апIбахъна гъафнийи. Агьалйирихъди дугъу урхурайи вузарикан, ссузарикан ктIукку студентар хъана дина кьабул апIбан, медицинайин идарйириъ сагъламвал мюгькам апIуз квотйир тувбан, бегьем дару мобилизацияйин дахилнаъди СВО гъябгъюрайи йишваз душнайидарин хизанариз кюмек тувбан, гьацира бикарар ляхнихъди тямин апIуз кюмек тувбан месэлйир гьял гъапIну.
Гюрюшдиъ гьацира Жалалудин Аьлирзаевди, Дагъ.Огни шагьрин администрацияйин главайин заместитель Эльдар Велиев кIулиъ ади, военный гьисабназ гъадагъру отделин (ВУС) начальникдихъди, волонтерарихъди бегьем дару мобилизацияйин дахилнаъди СВО гъябгъюрайи йишваз душнайидарин хизанариз апIурайи кюмекнакан, мобилизацияйикк ккахъну дявдин частариъ гьязур апIурайи ватандашариз хътапIурайи кюмекнакан ктибтнийи.
Дагъ. Огнийин кIулиъ айири шагьрин агьалйирикан ихь ватангьлийириз кюмек апIбан ляхниъ иштирак хьувал ккун гъапIнийи.
