Ав, гъийин мектебдиз дирбаш ва кьувватлу, вари терефарихъан артмиш вуйи ва чпин ляхниин аьшкьлу, бажаранвал кайи мялимар лазим ву. Йиз фикриан, Табасаран райондин Халагъ гъулан кьялан мектебдиъ физкультурайин дарсар киврайи мялим Исрафил Гьясанов гьацдар мялимарикан сар ву. Дицисдар касариз «гележег хъайир» кIури шулу. Дугъаз гъийин мялимдиз варитIан лазим вуйи ери а – чан ляхин апIуз аьшкь айивал.
Исрафил Гьясанов 1973-пи йисан Бухьнагъ гъулаъ бабкан гъахьну, хъа мектебдиъ дугъу гъунши Халагъ гъулаъ гъурхну. Мектеб ккудубкIну, дугъу Урусатдин Яракьлу Кьувватариъ гъуллугъ гъапIну, хъасин улихьгандин «Труд» кIуру совхоздиъ лихуз хъюгъну. Чан уьмур мектебдиз ва баяр-шубариз бахш дапIну ккуниваликан фикир дугъан кIулиъ либцури хайлин йисар вуйи, ва 2000-пи йисан думу ДГПУ-йин физкультурайин факультетдик урхуз кучIвнийи. Хъа 2003-пи йислан мина Исрафил Гьясанов Халагъ гъулан кьялан мектебдиъ физкультурайин дарсар кивру мялимди лихура.
– Гъийин мектебариъ урхурайидарин спортдихьна вуйи янашмиш’вал фициб ву? – кIуру йиз суалназ, Исрафил Гьясановди гьамциб жаваб тувнийи:
– Гьяйифки, спортдихьна улихьна йисариси аьшкь а, пуз шулдар, гьаз гъапиш, гизафдариз думу маракьлу предметси рябкъюрдар, гъийин девриъ гизаф баяр-шубариз мобильный телефонар, компьютерарин тамшир, Интернет маракьлу ву. Амма, дупну ккундуки, гъийин вахтнара физкультурайиин ва спортдиин юкIв али баяр-шубар цIиб адар. Дурарихъди лихубра аьхю шадвал ву. Баяр-шубар, – давам гъапIну Исрафил Гьясановди, – спортдиин маракьлу дапIну ккунду. Думу сабпи нубатнаъ дурарин сагъ’вализ лазим ву. Мялимдиз ляхин апIуз иштагь аш, дугъхьан баяр-шубарра спортдиин маракьлу апIуз, дурарин юкIвариъ спортдихьна ккунивалин цIюмгъял кчIибгуз шулу.
Халагъ гъулан кьялан мектебдин директор Мягьямед Мурадялиевди ич гюрюшдиъ гъапиганси, Исрафил Гьясановди баяр-шубар спортдиин машгъул апIбан терефнаан аьхю ляхин гъабхура. Мисалназ, 2013-пи йисан дугъу чан хусуси дакьатарихъ Бухьнагъ гъулаъ, хъа 2016-2017-пи урхбан йисан Халагъ гъулан мектебдин гъвалахъ спортдин майднар тикмиш гъапIну.
Директори дугъахь тербия гъадабгъурайидарин хъуркьувалариканра гъапнийи. Месела, Халагъ гъулан кьялан мектебдин волейбол уйнамиш апIрударин командайи Марат Рягьметов кIваин уьрхбаз бахш вуди кIули гъахурайи райондин талитариъ хъади-хъади шубуд йисан сабпи йи- швар, хъади-хъади кьюд йисан Назим Гьяжиибрагьимовдин ядигариз бахш вуди Ккувлигъ гъулаъ кIули гъягъюрайи зонайин талитариъ сабпи йишвар гъадагъна. Исрафил Гьясановди тербия туврайидар республикайин, РФ-дин Кьиблайин Федералин округдин ва жара эгьемиятлу талитариъ иштирак шулайи райондин волейболин командайин иштиракчйир вуди швнуд-сад йис ву. Дугъан ученик Г.Мурадялиев 2018-пи йисан Кисловодск шагьриъ РФ-дин Кьиблайин округдиъ сабпи йишв гъадабгъу республикайин командайин иштиракчи ву. Хъа ТIагьир Мягьямедов 2019-пи йисан волейболиан Грозный шагьриъ кIули гъушу талитариъ Табасаран райондин командайин дахилнаъди иштирак гъахьну. Думу талитариъ ТIагьир Мягьямедов варитIан ужурсир волейбол уйнамиш апIрур вуди гьисаб гъапIнийи. Шаксузди, му хъуркьувалар чиб-чпиланди шулайидар дар. Думу хъуркьуваларикъ мялимдин аьхю зегьмет къа. Гьам мектебдиъ вуйи тренировкйир гъахувал, гьамсана, устадвал за апIбан бадали, жюрбежюр талитариъ баяр-шубарин иштирак’вал тямин апIувал.
Исрафил Гьясанов, ужуб зегьмет зигбаз лигну, мектебдин ва райондин 3-пи нумрайин ДЮСШ-дин дирекцияйин, райондин администрацияйин терефнаан швнуб-сабан гьюрматнан грамотйириинди лишанлу гъапIну.
Мялум вуйиси, аьхиримжи йисари райондиъ спортдин артмиш’вализ аьхю фикир тувра ва думу терефнаан аьхю хъуркьуваларра гъазанмиш дапIна. Хъа дицисдар хъуркьувалар ляхнин ужудар пишекрар айиган шулу. Гьацдар пишекрарикан, шаксузди, Исрафил Гьясановра гьисаб апIуз шулу.
