14-пи ноябриъ Хив райондин мектебарин 10-пи классариъ урхурайи 50 бай Дербент шагьриъ Гь. Б. Къазиаьмедовдин ччвурнахъ хъайи пишекарвалинна педагогвалин колледждин гьяятдиъ ерлешмиш дубхьнайи, жигьилариз дявдинна ватанпересвалин тербия тувру «Авангард» кIуру центриз рякъ’ин гъапIнийи.

 

 

Баяр «Авангард» центриз гьаайиз, дурарихъди Хив райондин образованиейин отделин начальникдин вахтназ вуди тербияйин ляхинкIули гъабхурайи заместитель Назаряли Тарланов райондин образованиейин отделин гьятдиъ. гюрюшмиш гъахьнийи.

«Гьяфтайин арайиъ учвуз ОБЖ-йин ва НВП-йин дарсариъ гьуркIну тувру цIийи аьгъювалар кIваинди гъитай ва кьимат тувай. Фицики, закур учву армияйиз гъягъруган, му аьгъювалар гьязур вуйи шибритI вучвуз. Хъа армияйиз гъягъювал – гьарсар жили веледдин асас буржйирикан саб ву. «Авангард» центриъ, шубубан ипIруб туври, дахъуз-гъудужвуз ужуб марццишин айи общежитиера а. Дарсариз лазим вуйи шей’ар ва палтар дилин чIанади тувру. Учвкан ккунди айиб, анжагъ аьхюри гъапибдихъ хъебехъну, жвуваз гъапIу бирмиш-буйругъ адмийи тамам апIувал ва жвув аьлакьалуди гъахувал ву. Учвкан ккун апIураза, мектебдиз, райондин администрацияйиз гаф гъюруб мапIанай, учву ужуб терефнахъанди улупай. Учву йишв’ина гъахайиз ва райондиз, гъулариз кьяляхъ хруганра, учу ичв гъайгъушнаъ ача», – къайд гъапIнийи чан улхбаъ Назаряли Аслановичди.

КIваин апIуз ккундузузки, 10-пи классдиъ урхурайи гьарсар балин анкета абйир-бабари, ОБЖ-йин дарсар киврайи мялимари, классарин руководителари ва мектебариъ директорарин тербия тувбан ляхин кIули гъабхурайи завучари гьяфта улихьна гьязур дапIнайи. Анкетайин сиягьнаъ райондин ЦРБ-йиан медицинайин справка, мектебдиъ дугъриданра 10-пи классдиъ урхура кIуру справка, классдин руководители хил’инди дибикIнайи характеристика, паспортдин, снилсдин ва метрикайин копйир айи. Гьарсар урхурайирин анкета вахтниинди гьязур дапIнайивализ лигну, баяр, саб улхуб-рахубра адарди, гьииди рякъ’ин гъапIнийи.