Гьар йисан 21-пи ноябриъ Урусатдин Федерацияйин налогарин органариъ лихурайидари чпин пишекарвалин машквар къайд апIура. Ва гьарганси, ццира декабрин 1-пи йигъаз республикайин шагьрариъ ва районариъ айи налогарин гъуллугънан инспекцйири улупнайи кьадар налогар вахтниинди уч апIбан серенжемар кIули гъахура. Думу серенжемарин метлеб – инсанари чпин девлетнан тяйин дапIнайи бурж тувуб ву.

 

 

Налогар уч апIурайидарин пишекарвалин машквар тебрик апIури, узу Дагъустан Огни шагьриъ ерлешмиш дубхьнайи идарайиз, Урусатдин федеральный налогарин ляхнин Дагъустан Республикайин 4-пи нумрайихъ хъайи районарин арайин инспекцияйин гъуллугъчи Рабаданов Къурбан Мягьямедовичдихьна илтIикIнийза. Дугъан гафаринди, Дагъ. Огни шагьриъ налогар вахтниинди уч апIуз агьалйирин энгелвали манигъ’вал апIура. Гьелелиг ццийин йискан шагьрин бюджетдиз 41663 миллионтIан пул уч дубхьнадар. Му кьадар налогар уч апIбаъ шагьрин администрацияйин гъуллугъчйирира аьхю роль уйнамиш гъапIну.

Дупну ккундуки, гъийин йигъан налог тувуз ккуни касдиз думу ляхин апIуз фукьан вушра гизаф мумкинвалар а. Телефон хьадру кас адар, ва гьарсар агьалийихьан, телефондиан госуслугйириъ учIвну, хулаъ имиди налогар тувуз шулу. Налоговый тешкилатдин гъуллугъчийин мялуматниинди, Дагъ. Огни шагьрин налогар туврайи касар думу къайдайиинди ляхин тешкил апIуз шулайивалиин разиди ву. Му аьгьвалатну шагьрин бюджетдиз аьлава пул хуз кюмек тувра ва налогарин идарйирин пишекраринна агьалйирин арайиъ айи алакьайин дережа за апIура.