Вари ихь уьлкейиъси, Табасаран райондиъра Аьхю Гъалибвалин Йигъ шадвалин шартIариъ къайд гъапIну. Серенжемар райцентриан Гъалибвалин паркдиз «Аьжалсуз полкнан» марш гъябгъбиинди башламиш гъапIнийи. Къайд дапIну ккундуки, ццийин йисан «Аьжалсуз полкнан» маршдиъ чпин абйирин, аьхю абйирин, мирасарин – Ватандин Аьхю дявдиъ гъийихдарин ва дидин иштиракчйирин портретар, машкврин пайдгъар хьади саки 5 агъзурихьна агьалйир иштираквал кIули гъубхну.
Гъалибвалин паркдиъ Ватандин Аьхю дявдиъ гъийихдарин гьюрматназ дивнайи гюмбтихъ кюкюйир дивну ва митинг гъабхьну.
Митингдиъ удучIвну улхури, Табасаран райондин глава Мягьямед Къурбановди къайд гъапIну: «Ватандин Аьхю дявдин кIваълан гьауз даршлу мусибатнан йивбар ккудукIну, магьа 74 йис гъушну. Гизаф йисариз давам гъабхьи думу дявдиъ ихь гирами Ватан, ихь халкьдин асиллу дарувал уьрхуз, аьхюр-бицIир дарпиди, вари гъудужвнийи. Вари уьлкейин халкьарихъди сабси, Табасаран райондианра 3 агъзуртIан артухъ жигьилар дявдиз гъушнийи. Дурарин аьхюну пай кьяляхъ гъафундар. Табасаранлуйирира дявдин женгариъ, гъалибвал гъадабгъбан бадали, чпин жанар гьяйиф гъапIундар, аьхю гьунарар улупну. Умудлуди кIураза, Табасарандихьан чан баяриинди дамагъ апIуз шулу, табасаран баяр гьаммишан насларин гьунарариз вафалу ву». Мягьямед Къурбановди митингдиз уч духьнайидар ва райондин вари агьалйир Аьхю Гъалибвалин машкврихъди тебрик гъапIнийи.
Митингдиъ, саб дакьикьайиъ ккебехъну дийибгъбиинди, Ватандин Аьхю дявдиъ гъийихдарин яс гъюбхнийи.
Митингдиъ РД-йин Халкьдин Собраниейин депутат Алавудин Мирзабалаевди, РД-йин Главайин, Гьюкуматдин ва Халкьдин Собраниейин терефнаан уч духьнайидар ва райондин вари агьалйир Аьхю Гъалибвалин машкврихъди тебрик ва гьарган Жилиин ислягьвал хьувал ккун гъапIнийи. «Ватандин Аьхю дявдиъ гъазанмиш гъапIу Аьхю Гъалибвал – му ихь халкьдин гафнан сабвалин ва гьунарарин лишан вуди гьаргандиз гъубзиди», — гъапнийи Алавудин Мирзабалаевди.
Серенжемдиъ удучIвну улхури, Табасаран райондин военкомдин заместитель Надир Шихягьмедовди Ватандин Аьхю дявдин йисари райвоенкоматди гъапIу ляхникан, ихь ватанагьлйири дявдиъ улупу гьунарарикан, гьамусяаьт райондиъ думу дявдин шубур иштиракчитIан яшамиш шули имдруваликан гъапнийи. Гъи райондиъ яшамиш шулайи Ватандин Аьхю дявдин иштиракчйир Шилла гъул’ан вуйи Рамазан Къурбанов, Халагъ гъул՚ан Гьясан Ражабов ва Дарвагъ гъул’ан Аьли Аьлиев ву. Надир Шихягьмедовди уч духьнайидар машкврихъди тебрик гъапIнийи.
Митингдиъ Ватандин Аьхю дявдин чIивиди имбу ветеранарикан иштирак шулайир анжагъ сар Гьясан Ражабов вуйи. Дугъу, аьхю машкврихъди тебрик апIури, уч духьнайидариз кIул’ин гьарган ислягь зав хьувал, дявдин читинвалар дярякъювал, ватандин аку гележег бадали гьарган гъайгъушнаъ хьувал ккун гъапIнийи.
Серенжемдиъ райцентрин сабпи нумрайин мектебдиъ ва «Юлдаш» ЦО-йиъ урхурайидари гьязур дапIнайи литературайин жюрбежюр эсерар гъурхнийи ва музыкайин сягьнйир улупнийи.
Митингдин кьяляхъ машкврин шадвалин серенжемар райцентриъ давам гъахьну. Машкврин иштиракчйириз Аьхю Гъалибвалин машквриз бахш дапIнайи концерт улупну, стадиондиин, Кьалухъ Мирзайин ччвурнахъ хъайи спорткомплексдиъ спортдин серенжемар кIули гъушну.
